Беларускі IT-праект трапіў у фінал конкурсу Microsoft

Пераможцу дастанецца грашовы прыз у $100 тысяч і грант платформы Azure на $120 тысяч.

Беларускі праект The Best Consultant прайшоў у фінальную стадыю спаборніцтваў студэнцкіх і школьных ІТ-распрацовак Imagine Сup, якую праводзіць карпарацыя Microsoft.

Пра гэта belmir.by паведаміў 17-гадовы выпускнік слуцкай школы №11 Ян Шляхаў - капітан каманды Team TBC, якая прэзентуе праект на конкурсе.

The Best Consultant - сістэма для ўдасканалення работы крамаў, якая дапамагае вызначыць патрэбнасці пакупніка зыходзячы з яго знешняга выгляду.

З дапамогай камер назірання яна аналізуе знешнасць і эмацыянальны стан кліента і дае прадаўцу падказкі, як лепш камунікаваць і які тавар прапанаваць.

- Але The Best Consultant можа мець шырокае ўжыванне. Цяпер, напрыклад, дадатак тэстуецца ў сістэме «разумнага дома» і як дадатак для HR-мэнэджараў, - распавёў Ян.

Са словаў жыхара Слуцка, на спаборніцтвы Microsoft ён трапіў, падаўшы заяўку. Затым паслядоўна стаў пераможцам двух этапаў - адбору ў Беларусі і адбору ў рэгіёне Усходняя Еўропа.

У выніку цяпер Шляхаў рыхтуецца ляцець у амерыканскі Сіэтл. Менавіта там 25 ліпеня адбудзецца фінал конкурсу, на які збяруцца дзясяткі студэнцкіх каманд з усяго свету.

Пераможцу дастанецца грашовы прыз у 100 тысяч даляраў, ментарства кіраўніка Microsoft Сацьі Надэллы, грант платформы Azure на 120 тысяч даляраў і ўдзел у канферэнцыі Build.

У камандзе Team TBC, акрамя Яна, - двое хлопцаў з Арменіі, якіх ён запрасіў пасля перамогі ў адборах. У Сіэтле патрэбная каманда з трох чалавек, а яны прэзентавалі падобныя праекты.

- Як усё атрымалася? У мяне быў вельмі добры настаўнік па інфарматыцы - Уладзімір Жук, які прымушаў рабіць нейкія працы і ездзіць на канферэнцыі, - тлумачыць Шляхаў.

Плюс, як прызнаецца, ён хацеў паступіць у ВНУ без лішніх хваляванняў, не здаючы цэнтралізаванае тэставанне. А для гэтага трэба было дзесьці вызначыцца.

Так і выйшла знайсці добрую ідэю і папрацаваць над ёй разам з настаўнікам і яшчэ адным яго вучнем - Уладам Гадаловым. А школа заўсёды дапамагала з праездам на розныя форумы.

Праект The Best Consultant у выніку ўжо быў прадстаўлены на многіх канферэнцыях у Беларусі і за мяжой і здабываў на іх прызавыя месцы.

Між іншым, перамога на адным з такіх форумаў у Бялградзе дала Яну магчымасць трапіць у БДУ на факультэт прыкладной матэматыкі і інфарматыкі без уступных выпрабаванняў.

- Таксама ёсць магчымасць паступіць у расейскі ўніверсітэт «Вышэйшая школа эканомікі», але, хутчэй за ўсё, гэта будзе БДУ. У Маскве занадта дорага жыць, - растлумачыў жыхар Слуцка.