Fitch пацвердзіла рэйтынгі трох беларускіх дзяржбанкаў на ўзроўні «B»

Банкі знаходзяцца на недастатковым узроўні крэдытаздольнасці.

Fitch Ratings пацвердзіла доўгатэрміновыя рэйтынгі дэфолту эмітэнта (РДЭ) трох беларускіх дзяржбанкаў – Беларусбанка, Белінвестбанка і Банка развіцця Рэспублікі Беларусь (БРРБ) – на ўзроўні "B" са "стабільным" прагнозам, паведамляе "Інтэрфакс".

Рэйтынгі ўлічваюць меркаванне Fitch пра высокую гатоўнасць дзяржавы падтрымліваць гэтыя банкі ў выпадку неабходнасці з улікам іх высокай сістэмнай значнасці, сказана ў прэс-рэлізе агенцтва.

З іншага боку, "нізкія ўзроўні рэйтынгаў прадаўжаюць адлюстроўваць абмежаваную здольнасць уладаў падтрымліваць банкі, асабліва калі падтрымка неабходная ў замежнай валюце, улічваючы слабую вонкавую пазіцыю дзяржавы і патэнцыйна істотныя ўмоўныя абавязальніцтвы ў падтрымцы дзяржсектара эканомікі", адзначаюць эксперты Fitch.

Яны тлумачаць, што падтрымка ад дзяржавы будзе складанай у выпадку "сур'ёзнай стрэсавай сітуацыі" з улікам абмежаваных рэзерваў ($ 7,3 мільярдаў на канец 2017 гады) пры тым, што сумарна валютныя дэпазіты трох банкаў на канец 2017 года склалі за $5,3 млрд, агульны аб'ём недэпазітных абавязальніцтваў – $3,9 млрд, а ліквідныя валютныя актывы – $1,1 млрд.

Валютныя абавязальніцтвы складалі 67% ад сумарных абавязальніцтваў у Беларусбанка і 62% у Белінвестбанка на канец 2017 года. Кароткатэрміновая рызыка рэфінансавання была істотнай, паколькі высокаліквідныя і размешчаныя за мяжой валютныя актывы пакрывалі 41% ад 12-месячнага аб'ёму пагашэння замежнага фандавання ў Беларусбанка і 30% у Белінвестбанка на канец I квартала 2018 года.

У Fitch адзначаюць "вельмі высокую" сістэмную значнасць Беларусбанка, у якім на канец I квартала 2018 года сканцэнтравана 42% кліенцкіх сродкаў банкаўскага сектару і 45% крэдытнага партфеля банкаўскага сектару.

БРРБ гуляе значную ролю ў палітыцы як банк развіцця, які ажыццяўляе сваю дзейнасць у межах адмысловага юрыдычнага статусу з 2011 года. Паводле звестак Fitch, БРРБ чакае ўнёсак у асноўны капітал ад дзяржавы цягам 2018 года.

Дзель Белінвестбанка на рынку складае 6%. На думку Fitch, планы дзяржавы адносна ўваходу ЕБРР у капітал Белінвестбанка з 25% -ай дзеллю не прывядуць да істотнага змянення гатоўнасці ўладаў падтрымліваць банк, пакуль дзяржава валодае кантрольнай дзеллю. Пры гэтым агенцтва не выключае пэўную падтрымку перад продажам.

Рэйтынг "B" азначае істотна недастатковы ўзровень крэдытаздольнасці.