Шольц паабяцаў абараняць краіны Балтыі ў выпадку нападу Расеі

Канцлер Нямеччыны правёў перамовы з прэм'ерамі Эстоніі, Латвіі, Літвы.

Канцлер Нямеччыны Олаф Шольц правёў перамовы з прэм'ерамі Эстоніі, Латвіі, Літвы. Ён запэўніў, што да канца 2027 года фармаванне брыгады ў Літве будзе закончанае.

Пра гэта паведамляе Bloomberg.

Канцлер Нямеччыны 6 траўня правёў перамовы ў Рызе са сваімі калегамі з Латвіі, Эстоніі і Літвы, адзначыўшы, што бяспека трох краінаў, якія мяжуюць з Расеяй і Беларуссю, таксама з'яўляецца ключавой для бяспекі Нямеччыны.

«Я таксама хацеў бы сказаць тут: напад на вас будзе нападам і на ўсіх нас», – дадаў Шольц на супольнай прэс-канферэнцыі з Эвікай Сілініяй з Латвіі, Каяй Калас з Эстоніі і Інгрыдай Шыманітэ з Літвы.

У час супольнага выступу з канцлерам Шольцам прэзідэнт Літвы Гітанас Наўседа заклікаў Нямеччыну паскорыць разгортванне нямецкай брыгады, беручы да ўвагі ўварванне Расеі ва Украіну і пагрозы іншым былым савецкім рэспублікам.

Як адзначаецца, адпраўка брыгады ў краіны Балтыі з'яўляецца часткай «гістарычнага пералому» ў ваеннай палітыцы, які Шольц абвясціў у сваёй прамове ў парламенце ўсяго праз некалькі дзён пасля таго, як Расея пачала поўнамаштабнае ўварванне ва Украіну ў лютым 2022 года.

Нямеччына не толькі накіроўвае брыгаду на сталую дыслакацыю ў Літве, але і ўзмацняе ўсходні фланг NATO з дапамогай актуальнай місіі патрулявання паветранай прасторы над краінамі Балтыі і баявой групы ўзмоцненай перадавой прысутнасці, якую ўзначальвае Нямеччына.