Перадзел рынку і ўдар па Шайгу: што стаіць за арыштам намесніка міністра абароны РФ

Інсайдэры ў расейскай уладзе падзяліліся інфармацыяй.

Арышт высокапастаўленага генерала расейскага войска, намесніка міністра абароны РФ Цімура Іванова сведчыць аб зніжэнні апаратнага ўплыву даўняга паплечніка прэзідэнта Уладзіміра Пуціна міністра Сяргея Шайгу і ўзмацненні ўплыву спецслужбаў, распавялі The Moscow Times дзве крыніцы ў расейскай урадзе і чалавек, блізкі да Крамля.

Усе яны пагадзіліся размаўляць на ўмовах ананімнасці, бо не ўпаўнаважаныя рабіць заявы для прэсы.

«У першую чаргу арышт Іванова - гэта перадзел рынку. Ён курыраваў не проста будоўлю, а вайсковыя падрады, гэта самае смачнае і вялікае. Але і, вядома, гэта вельмі сур'ёзны палітычны і апаратны ўдар па групе Шайгу», - сказаў The Moscow Times чыноўнік урада.

Арыштаваны напярэдадні маскоўскім судом Іваноў быў блізкі да Шайгу. Пасля пачатку поўнамаштабнага ўварвання ва Украіну ён часта наведваў акупаваныя Расеяй тэрыторыі.

Напрыклад, інспектаваў жылы комплекс у зруйнаваным Марыупалі, які расейскі прэзідэнт Пуцін наведаў у 2023 годзе падчас сваёй адзінай піяр-паездкі ў акупаваны горад, арганізаванай для яго ўначы з меркаванняў бяспекі.

Разам з прызначаным на пастанову Масквы кіраўніком «ДНР», акупаванай часткай Данецкай вобласці Украіны, Дзянісам Пушыліным, Іваноў пабываў на будоўлі за некалькі месяцаў да таго. Там яны нахвальвалі некалькі новабудоўляў, вакол якіх відаць былі разбураныя падчас расейскага ўварвання дамы, і абвінавачвалі ў разбурэннях «нэанацыстаў».

Акрамя таго, Іваноў курыраваў будоўлю вадавода з ракі Дон у канал Северскі Данец, па якім Расея пачала пастаўляць ваду ў акупаваныя Данецк і Луганск. Таксама ён курыраваў будаўніцтва 90% абарончых збудаванняў на лініі судакранання паміж вайскоўцамі Украіны і Расеі.

Багацце і раскошнае жыццё сям'і Іванова, абвінавачанага ў атрыманні хабару на мільён рублёў, не было таямніцай ні для спецслужбаў, ні для расейскай палітычнай эліты. «Сапраўдных злоўжыванняў у частцы распараджэння вайсковай маёмасцю было мноства. Але за гэта яго варта было арыштоўваць раней», — сказала The Moscow Times крыніца, блізкая да Мінабароны.

Ён дадаў, што выбар моманту для арышту - а ён адбыўся ўсяго за некалькі тыдняў да інаўгурацыі Пуціна на пяты тэрмін і пачатку фармавання новага ўрада - «кажа хутчэй аб палітычных прычынах і не самых трывалых пазіцыях Шайгу».

Усе крыніцы The Moscow Times сыходзяцца ў меркаванні, што арышт Іванова ніяк не адаб'ецца на здольнасці расейскага войска працягваць ваеннае ўварванне ва Украіну, бо Іваноў «не меў дачынення ў ваеннай справе». «З вялікай імавернасцю гэта нават не перашкодзіць і Сяргею Шайгу захаваць сваю пасаду ў новым урадзе. Але яго пазіцыі будуць прыкметна аслабленыя», - сказаў чыноўнік урада Расеі.

«Агулам тое, што здарылася, і ў інтарэсах Пуціна. Ён ніколі не дае занадта ўзмацніцца ніводнай з груп. А грамадству гэта паднясуць як барацьбу з карупцыяй», - сказаў іншы расейскі чыноўнік.

Арышт намесніка міністра азначае, што ФСБ збірае кампрамат у дачыненні да ўсяго міністэрства і яго кіраўніка, сказаў The Moscow Times старэйшы навуковы супрацоўнік Цэнтра аналізу еўрапейскай палітыкі Андрэй Салдатаў. «Іваноў жа зараз на ўсіх паказанні даваць будзе. Звычайна гэта спосаб кантролю, а не рэпрэсій. Так крамлёўскі рэжым развязывае задачу падтрымання кіравальнасці. Як яны гэта разумеюць», - сказаў Салдатаў.