У Гародні суд вынес пастанову паводле справы аб выбуху на Скідзельскім цукровым камбінаце

Расследаванне справы вялося амаль два гады.

У Гародні вынеслі прысуд паводле справы аб выбуху на Скідзельскім цукровым заводзе. На абвяшчэнні прысуду - поўная зала: прыйшлі пацярпелыя, сваякі абвінавачаных і журналісты, піша tut.by.

Абвінавачаныя прызнаныя вінаватымі паводле артыкула 428 КК (Службовая халатнасць). Начальніца цэха, дзе адбыўся выбух, Уладзіміра Малашэвіча суд прысудзіў да 5 гадоў агульнага рэжыму, ягонага намесніка Сяргея Грушэўскага - да 4 гадоў, галоўнага інжынера прадпрыемства Уладзіміра Губарэвіча - да 5 гадоў. Таксама яны не могуць займаць адпаведныя пасады цягам 5 гадоў.

З іх будзе спагнана салідарна на карысць цукровага завода больш за 560 тысяч беларускіх рублёў. Акрамя гэтага яны павінны будуць аплаціць усе працэсуальныя выдаткі, іх маёмасць застанецца пад арыштам да кампенсацыі шкоды.

Таксама суд пастанавіў спагнаць з завода па 30 тысяч рублёў у якасці маральнай шкоды на карысць трох пацярпелых.

Акрамя таго, вынесеная прыватная пастанова што да цукровага камбіната. Падчас судовых пасяджэнняў было выяўлена, што работы для ачысткі цэхаў праводзіліся толькі перад праверкамі. Работнікі былі ў сінтэтычным адзеннем, што паўплывала на колькасць апёкаў, абсталяванне не было заземленае належным чынам. Ачыстка цэхаў ад цукровага пылу праводзілася няпоўнасцю, прамысловы пыласос не выкарыстоўваўся, ён наогул знаходзіўся ў іншым памяшканні, службовыя інструкцыі падпісваліся няправільна. Суд у прыватным парадку пастанавіў ліквідаваць хібы.

Пазіцыя стараны абвінавачання была аналагічнай пастанове суда. З гэтай пастановай суда абвінавачаныя не згодныя і збіраюцца абскардзіць прысуд. Абвінавачаных узялі пад варту ў зале суда.

Нагадаем, разгляд крымінальнай справы паводле факту выбуху на Скідзельскім цукровым камбінаце пачаўся ў судзе Гарадзенскага раёна 11 лютага. На лаве падсудных - тры чалавекі: начальнік цэха, дзе адбыўся выбух, Уладзімір Малашэвіч, ягоны намеснік Сяргей Грушэўскі, а таксама галоўны інжынер прадпрыемства Уладзімір Губарэвіч. Усе трое віну не прызнавалі.

Выбух пылапаветранай сумесі на цукровым камбінаце адбыўся 25 лютага 2017 года. Пяць работніц камбіната (узрост - 42-54 года) атрымалі апёкі (ад 50% цела і вышэй), баратраўмы і былі шпіталізаваныя. Пазней трох з іх перавезлі ў Рэспубліканскі апёкавы цэнтр у Менску, але жанчыны памерлі праз некалькі дзён пасля выбуху. 13 сакавіка ў гарадской клінічнай лякарні хуткай медыцынскай дапамогі памерла чацвёртая з пяці пацярпелых.

Пятую жанчыну ўдалося выратаваць, але яна страціла працаздольнасць.

Прадпрыемству была прычыненая маёмасная шкода на суму больш за 500 тысяч рублёў. Расследаванне справы вялося амаль два гады.

Пракурор папрасіў прызнаць абвінавачаных паводле справы вінаватымі ў службовай халатнасці і прызначыць галоўнаму інжынеру Губарэвічу і начальніку цэха гатовай прадукцыі Малашэвічу па 5 гадоў пазбаўлення волі ў калоніі агульнага рэжыму з пазбаўленнем права займаць пэўныя пасады; намесніку начальніка цэха гатовай прадукцыі Грушэцкаму - чатыры гады пазбаўлення волі калоніі агульнага рэжыму з пазбаўленнем права займаць пэўныя пасады.

Таксама, на думку дзяржаўнага абвінаваўцы, абвінавачаныя павінны ў салідарным парадку выплаціць шкоду, прычыненую выбухам цукроваму камбінату. Сума шкоды - крыху большая за 560 тысяч рублёў.

У астатнім слове абвінавачаныя прынеслі спачуванні пацярпелым і сваякам загінулых у выніку выбуху. Мужчыны казалі, што амаль усё іх працоўнае жыццё было звязанае з цукровым заводам, свае абавязкі яны выконвалі добрасумленна і сваёй віны ў тым, што здарылася не бачаць. Абвінавачаныя звярнулі ўвагу суда на тое, што звярталіся да кіраўніцтва з нагоды рэканструкцыі цэха, у якім адбыўся выбух, бо выдзяленне грошай на такія працы ад іх не залежала.

«Я намагаю, што расследаванне праведзена не ў тым кірунку. Больш скрупулёзна павінны былі паставіцца да гэтай справы. Адно суцяшае - што мяне паважаюць людзі, не толькі прадпрыемства, але і пасёлка, перажываюць за мяне», - сказаў Уладзімір Губарэвіч.