Схема «залатых віз»: у ЕЗ заклікалі спыніць адмываць грошы

Праграмы продажу грамадзянства і пасведчанняў на жыхарства для заможных замежнікаў дзейнічаюць у 20 з 28 краін ЕЗ.

Еўрапейскі парламент заклікаў краіны-сябры ЕЗ спыніць практыку адмывання грошай у блоку, спыніўшы праграмы продажу віз і пашпартоў. Пра гэта паведамляе liga.net са спасылкай на Reuters.

Прыхільнікі гэтай схемы мяркуюць, што яе знішчэнне здольнае нанесці эканамічную шкоду, што вылічваецца ў некалькі мільярдаў даляраў.

Рэкамендацыя што да «залатых віз» з'яўляецца часткай прэзентаванага ў Еўрапарламенце жорсткага дакладу, у якім таксама сем краін ЕЗ абвінавачваюцца ў тым, што сталі «падатковымі сховішчамі». Гэта Люксембург, Кіпр, Ірландыя, Мальта, Вугоршчына, Бэльгія і Нідэрланды.

Даклад стаў вынікам гадавой працы парламенцкага камітэта фінансавых злачынстваў і ўхілення ад выплаты падаткаў. Даклад прыняты ўсёй асамблеяй, што павышае яго палітычную вагу, хоць ён і застаецца неабавязковым.

Цяпер праграмы продажу грамадзянства і пасведчанняў на пражыванне для заможных замежнікаў дзейнічаюць у 20 з 28 краін ЕЗ.

Эканамічныя перавагі гэтых схем «не кампенсуюць сур'ёзную пагрозу бяспецы, адмыванню грошай і рызыку ўхілення ад выплаты падаткаў», гаворыцца ў рэзалюцыі.

З іншага боку, у Радзе інвестыцыйнай міграцыі заявілі, што спыненне рэалізацыі праграм паставіць пад пагрозу жыццёва важныя інвестыцыі ў «перыферыйныя краіны».

У студзені паведамлялася, што Балгарыя збіраецца спыніць даваць магчымасць багатым замежнікам купляць грамадзянства за інвестыцыі. Мінюст краіны заявіў, што гэтая схема не прынесла заўважнай эканамічнай выгады для Балгарыі.