Расейскай эканоміцы выдалі «штармавое папярэджанне»
3- 19.02.2019, 14:03
- 15,607
Зводны апераджальны індэкс значна знізіўся.
Над расейскай эканомікай прадаўжаюць згушчацца хмары падзення платаздольнага попыту і пагаршэння кан'юнктуры на рынку энэрганосьбітаў, піша finanz.ru.
Зводны апераджальны індэкс, які разлічваецца для Расеі на падставе метадалогіі АЭСР і складаецца з параметраў, якія ўплываюць на будучую дынаміку ВУП, у студзені значна знізіўся, паведамляе ў «Каментарах аб дзяржаве і бізнэсе» Цэнтр развіцця Вышэйшай школы эканомікі.
За месяц індыкатар асеў з мінус 1,7% да мінус 2,1%, а зафіксаванае значэнне стала мінімальным з лета 2016 года.
Адбілася падзенне коштаў нафты, ад якіх наўпрост залежыць блізу чвэрці валютных даходаў расейскай эканомікі: агулам, паводле звестак Мінфіна, кожны барэль расейскага гатунку Urals прадаваўся за мяжу па 59,85 даляра, што на 12,5% менш, чым у студзені 2018 года.
Здабычу нафты пры гэтым давялося скараціць - 0,8% год да года праз дзеянне пагаднення АПЕК +, якое Расея перагледзіць з блізкаўсходнімі вытворцамі ў снежні.
У лютым новыя непрыемнасці прыйшлі з газавага рынку: экспарт у далёкае замежжа значна знізіўся на фоне цёплага надвор'я ў Еўропе і эканамічнага крызісу ў Турцыі, якая яшчэ летась скараціла закупкі ў «Газпрома» амаль на 25%.
З 1 да 15 лютага газавыя пастаўкі ўпалі на 8%, да 8,3 млрд кубаметраў, і калі хуткасць прапампоўкі захаваецца, то па выніках месяца «Газпром» прадасць на 12% менш, чым год таму, падлічыў «Інтэрфакс».
Згодна з прадпрымальніцкім апытаннем, у студзені ў расейскіх вытворцаў па-ранейшаму назіралася зніжэнне заказаў на прадукцыю, адзначаюць у ВШЭ: Кожнае трэцяе прадпрыемства апрацоўчай прамысловасці жалілася на «недастатковы попыт».
Аб'ёмы вытворчасці на фабрыках і заводах пачалі падаць - на 1% год да года, або максімальную са снежня 2017 года велічыню.
«За гэтым, безумоўна, стаіць ўжо застарэлая слабасць унутранага попыту», - канстатуе кіраўнік Цэнтра аналізу сацыяльных праграм і рызык ВШЭ Сяргей Смірноў. На магчымасці спажыўцоў цісне зніжэнне даходаў, якое прадаўжаецца пяць гадоў, паскарэнне інфляцыі і падвышэнне падаткаў.
Рост ПДВ з 18% да 20% раўнасільны канфіскацыі з кішэняў 500 млрд рублёў за год і скарачэння рэальных даходаў яшчэ на 1%, падлічыў «Альфа-банк».
Усё гэта ўзмацняе імавернасць стагнацыйнага сцэнару, кажа Смірноў: «Даводзіцца канстатаваць, што расейская эканоміка застаецца ў зоне рызыкі, прычым да даўняга яе ўразлівага месца (слабага ўнутранага попыту) дадаецца фактар адносна нізкіх (у параўнанні з мінулым годам) нафтавых коштаў і адносна высокіх адсоткавых ставак».
«На фоне паскарэння інфляцыі рост рэальных заробкаў у студзені павінен быў спыніцца, а рэальныя даходы, хутчэй за ўсё, прадоўжылі зніжэнне. Паслабленне попыту не магло не адбіцца на сектары раздробнага продажу», - разважае дырэктар аналітычнага дэпартамента «Лока-Інвест» Кірыл Трэмасаў.
З улікам падзення апрацоўчай прамысловасці і правалу газавага экспарту дынаміка ВУП і зусім можа стаць адмоўнай, папярэджвае ён.