У РФ невядомыя з нажамі напалі на паліцэйскіх
- 24.01.2019, 20:38
- 10,778
Інцыдэнт адбыўся ў Нальчыку.
У Нальчыку невядомыя напалі на паліцэйскага, пра гэта ТАСС паведаміла крыніца ў сілавых структурах рэгіёну. Супрацоўнік праваахоўных органаў цяжка паранены. Паводле звестак суразмоўцы агенцтва, інцыдэнт адбыўся на скрыжаванні вуліц Ідарова і Суворава, на выездзе з горада ў бок Уладзікаўказа. Інфармацыю пра напад пацвердзіла таксама інфармаваная крыніца агенцтва «Интерфакс-Юг», але, з ягоных звестак, злачынцы напалі на аўтамабіль паліцыі, а двое нападнікаў былі толькі параненыя і дастаўлены ў бальніцу, яшчэ двое схаваліся.
Пазней інфармацыю пра напад пацвердзілі «РІА Новости» ва ўпраўленні Следчага камітэта па Кабардзіна-Балкарыі. У СК удакладнілі, што нападнікі былі з нажамі, двое з іх былі забітыя, яшчэ двое - параненыя. «Паводле папярэдніх звестак, чацвёра невядомых з нажамі напалі на супрацоўнікаў паліцыі. Паліцыянты адкрылі па нападніках агонь», - заявіў прадстаўнік ведамства.
У рэспубліканскім клінічным шпіталі паведамілі ТАСС, што паранены супрацоўнік паліцыі з пранікальным нажавым раненнем цяпер знаходзіцца на аперацыі, таксама пацвердзілі, што ў бальніцу паступілі двое невядомых без дакументаў.
У сваю чаргу, у МУС па рэспубліцы паведамілі агенцтву, што напад быў здзейснены на экіпаж ДПС з трох чалавек. У міністэрстве таксама паведамілі, што забітыя былі трое нападнікаў.
У прэс-службе СК па Кабардзіна-Балкарыі распавялі РБК дэталі таго, што адбылося. Паводле звестак ведамства, экіпаж ДПС спыніў машыну для праверкі дакументаў, і ў гэты момант да паліцыянтаў наблізіліся чацвёра мужчын з нажамі. «Скарысталіся сітуацыяй, што інспектары стаялі да іх спінай, і падбеглі да іх. Двое нападнікаў былі ўзброеныя нажамі, яны напалі на супрацоўнікаў паліцыі», - растлумачылі ў СК. Паліцыянты адкрылі агонь і забілі дваіх злачынцаў, яшчэ адзін памёр па дарозе ў бальніцу, чацвёрты шпіталізаваны.
У СК паведамілі, што распачатая крымінальная справа паводле арт. 317 КК (замах на жыццё супрацоўніка праваахоўнага органа). Цяпер праваахоўныя органы высвятляюць асобы нападнікаў.
