Бойка ў бабруйскім сэкандзе: прадпрымальніка абвінавачваюць у вымагальніцтве

Слуханні паводле грамадзянскага пазову адбудуцца 28 студзеня.

Суд у Бабруйску 24 студзеня аднавіў слуханні паводле крымінальнай справы аб бойцы ў краме адзення «Еўра-хэнд». Уладальніку гандлёвага месца Мікалаю Нарожнаму, які з 11 студзеня знаходзіцца пад вартай, выстаўленае абвінавачанне ў вымагальніцтве з ужываннем гвалту, паведамляе tut.by.

Перад пачаткам паседжання высветлілася, што адвакат абвінавачанага Таццяна Вярцінская напярэдадні падала хадайніцтва аб тым, каб справу перакваліфікавалі на падставе ч.2 арт.384 «Прымус да выканання абавязацельстваў». Яе папярэдняе хадайніцтва аб вызваленні Мікалая Нарожнага з-пад варты было адхіленае.

Cа слоў старэйшага памочніка пракурора Бабруйска Мікалая Тышкевіча, падчас бойкі Мікалай Нарожны патрабаваў ад Аліны Несцяровіч 200 даляраў ЗША ў якасці кампенсацыі за скрадзеныя рэчы. Лёгкія цялесныя пашкоджанні, якія пры гэтым былі прычыненыя жанчыне, дазваляюць кваліфікаваць дзеянні падсуднага як вымагальніцтва з ужываннем гвалту.

Мікалай Нарожны з выстаўленым яму абвінавачваннем не пагадзіўся.

Пацярпелая Аліна Несцяровіч распавяла, што 9 кастрычніка яна зайшла ў краму і ў гэты час размаўляла праз мабільны са знаёмым. Яна спынілася каля вешалак з адзеннем - і ў гэты момант гаспадар «Еўра-хэнда» Мікалай Нарожны яе аклікнуў. Далей мужчына замкнуў дзверы ў краме знутры і ўключыў ёй відэазапіс, на якім бачна, як пацярпелая кладзе ў кішэню майткі.

- Я адразу прызнала, што ўчыніла крадзеж, але больш нічога не паспела сказаць - ён ударыў мяне металічнай трубой ад вешалкі па назе, - заявіла ў судзе Аліна Несцяровіч.

Жанчына распавяла, што падчас бойкі абвінавачаны некалькі разоў цягаў яе за валасы, хапаў за горла, двойчы паваліў на падлогу, наступаючы каленямі на грудную клетку. За кожны ўдар, з яе словах, прадпрымальнік патрабаваў па 100 даляраў, пагражаў выбіць пацярпелай зубы і «наогул забіць».

Падчас канфлікту Мікалай Нарожны разбіў трубой мабільнік пацярпелай і парваў заплечнік (матэрыяльная шкода пазней была цалкам кампенсаваная), таксама ён, з яе слоў, спрабаваў зняць з пацярпелай залаты пярсцёнак, нібыта ў кошт выплаты запазычанасці, і патрабаваў партманэт, які Аліна Несцяровіч, з яе слоў, «засунула ў джынсы».

На момант бойкі ў гаманцы ў пацярпелай знаходзілася 5 тысяч расейскіх рублёў, 10 еўраў, 4 даляры ЗША і «трохі дробязі» ў беларускіх рублях. Бойка скончылася пасля таго, як яна, з яе слоў, прадэманстравала мужчыну свой разліковы лісток з невялікім заробкам, каб давесці - грошай у яе няма. Даведаўшыся прозвішча пацярпелай і месца яе працы, прадпрымальнік супакоіўся і адчыніў дзверы ў краме.

Жанчына сцвярджае, што сама на прадпрымальніка не нападала і не наносіла яму ўдары - толькі абаранялася.

Словы пацярпелай выклікалі пытанні ў суддзі Наталлі Агладковай - і яна зачытала сведчанні Аліны Несцяровіч падчас следства. У выніку пацярпелая ўдакладніла, што ўдараў па нагах металічнай трубой было ўсяго два, а не «не менш за тры», як яна заявіла падчас дачы паказанняў у судзе. Узніклі пытанні і ў адваката абвінавачанага: прадстаўніца абароны ўдакладніла, ці сапраўды Несцяровіч сур'ёзна ўспрыняла пагрозы прадпрымальніка аб тым, што той гатовы яе забіць.

Атрымаўшы маю згоду, адвакат пацікавілася, чаму ж дзеля выратавання жыцця пацярпелая не аддала нападніку гаманец. Аліна Несцяровіч патлумачыць гэта не змагла.

Падчас пасяджэння пацярпелая агучыла свае патрабаванні для кампенсацыі маральнай шкоды ў межах крымінальнай справы - яе яна ацаніла на 5 тысяч рублёў, заявіўшы, што «гэты чалавек цалкам сапсаваў мне жыццё». З улікам пазову паводле грамадзянскай справы аб абароне гонару і годнасці, у якім Несцяровіч патрабуе ад прадпрымальніка 2,5 тысячы рублёў кампенсацыі, агульная сума фінансавых прэтэнзій да прадпрымальніка складае 7,5 тысячы.

Прадаўжэнне слуханняў аб крымінальнай справе аб бойцы ў краме прызначанае на 6 лютага. Слуханні паводле грамадзянскага пазову адбудуцца 28 студзеня.