У цэнтры Берасця людзі жывуць у раскіданых дамах без вады і газу

Помнік савецкім абяцанням можна знайсці ў самым цэнтры Берасця.

Савецкі Саюз ужо даўно раскідаўся, але жыхары аднаго з раёнаў дагэтуль чакаюць абяцанага разгляду свайго жыллёвага пытання, перадае «Белсат».

Вуліца Маскоўская ў Берасці. Жыхары чатырох дамоў каля Кобрынскага моста больш за паўстагоддзя жывуць на валізках. Чыноўнікі яшчэ за савецкім часам паабяцалі забяспечыць іх новым жыллём, аднак гэтага не зрабілі.

«З 1963 года дамы гэтыя пад руйнаваннем. Людзі нічога не маглі зрабіць тут, не маглі нічога правесці. А цяпер нам кажуць, што ўсё ў нас у добра», - кажа жыхар дома ля Кобрынскага моста Аляксандр.

Традыцыю паабяцаць, але нічога не зрабіць перанялі і ўлады незалежнай Беларусі.

«Пісалі ва ўсе інстанцыі: у гарвыканкам, у аблвыканкам, у aдміністрацыю Лукашэнкі. Адказ адзін: вашы дамы пад руйнаванне не падпадаюць. Ваду людзі набіраюць з калонкі на суседняй вуліцы, ацяпленне - дровы, прыбіральня на вуліцы. 21-е стагоддзе на двары!» - кажа жыхарка вуліцы каля Кобрынскага моста Любоў.

Зноў надзея ўзнікла напярэдадні тысячагоддзя Берасця, якое горад адзначыць у наступным годзе. Чыноўнікі абяцалі, што людзей чакае «новае жыццё», калі пачнецца рэстаўрацыя Кобрынскага моста. Але замест паляпшэння стала яшчэ горш: будоўля пачала руйнаваць іх дамы.

«У мяне, напрыклад, трэшчыны пайшлі па хаце. Адзін кут пачаў апускацца... Я ўжо не ведаю, куды звяртацца!» - кажа жыхар дома ля Кобрынскага моста Эдуард.

Шмат пытанняў у мясцовых выклікае і праект рэстаўрацыі моста.

«Замест ліўнёўкі тут паклалі дрэнаж, у якога адзін рукаў, які пакладзены ў зваротным кірунку і які працаваць не будзе. Ліўні гэта ўжо паказалі - усё затапіла», - кажа Аляксандр.

Аднак на паперах у чыноўнікаў усё выглядае як трэба.

«Гэтая дакументацыя ўзгоднена з экалагічнымі і санітарнымі службамі, галоўным архітэктарам горада Берасця, УДАІ УУС Берасцейскага аблвыканкама, прайшла дзяржаўную пазаведамасную экспертызу і зацверджана ў прадугледжаным парадку», - кажа намеснік кіраўніка Берасцейскага гарвыканкама Мікалай Якубоўскі.

Улады руйнаваць дамы не збіраюцца. Але ў той жа час не дазваляюць іх жыхарам прадаць нерухомасць ці хаця б правесці ваду і газ.

«Хочацца спытаць чыноўнікаў: ці можна фізічна тут жыць? Жыць, працаваць, атрымліваць асалоду ад жыцця і казаць: так, мая краіна - найлепшая?! Пра нас забыліся», - кажа Любоў.

Людзі, якія сталі закладнікамі сваіх дамоў, прадаўжаюць чакаць. Гэтым разам - адказу ад гарадскога кіраўніцтва аб статусе сваіх будынкаў: яны ў аварыйным стане ці не?