Відэафакт: Аператар зняў інтэрв'ю з мэрам Масквы з локшынай на вушах

А як яшчэ слухаць абяцанні чыноўнікаў?

Мэр Масквы Сяргей Сабянін даў 18 ліпеня інтэрв'ю тэлеканалу «Масква 24», які быў заснаваны ў 2011 годзе на ягоную ж ініцыятыву і належыць мэрыі сталіцы. Гэта была тыповая размова пра «фармаванне сучаснага гарадскога асяроддзя», падчас якой кіраўнік горада распавядаў, як «важна, каб чалавеку ў гэтым горадзе жылося камфортна».

Тыповая, ды не вельмі! Адзін з аператараў, якія здымалі Сабяніна, павесіў сабе на вуха сапраўдную вараную локшыну.

Відэа з локшынай у сваім Інстаграм размясціў Сяргей Харытонаў, выявіла «Медуза»; ён жа, як мяркуецца, і ёсць галоўны герой роліка. Харытонаў падпісаў паведамленне хэштэг#обещалкин, #праўда, #единаяроссия, #ФБК, #свободаслова і #свободасми.

Адлюстраванне на экране камеры ў самым роліку, выкладзеным Харытонавым, выглядае невыразна. Аднак здымкі менавіта з гэтага ракурсу ўвайшлі ў інтэрв'ю, апублікаванае на сайце «Масквы 24».

Магчыма, акцыя з локшынай планавалася загадзя. У каментарах адна са знаёмых Харытонава напісала: «Вы зрабілі гэта! Божа, як я вамі ганаруся!»