Навальны падаў дакументы на рэгістрацыю партыі «Расея будучыні»
8- 22.06.2018, 16:44
- 10,809
Дакументы былі пададзеныя ў міністэрства юстыцыі РФ.
Дакументы на рэгістрацыю партыі «Расея будучыні» складзеныя ідэальна, праведзены федэральны з'езд і неабходная колькасць рэгіянальных канферэнцый, адзначыў апазіцыянер Аляксей Навальны, паведамляе «Немецкая волна».
Прыхільнікі апазіцыйнага палітыка Аляксея Навальнага падалі ў міністэрства юстыцыі РФ дакументы на рэгістрацыю партыі «Расея будучыні». Пра гэта паведамілі юрысты заснаванага Навальным Фонду барацьбы з карупцыяй (ФБК) Любоў Собаль, Іван Жданаў і Вячаслаў Гімадзі ў сваіх мікраблогах у Twitter у пятніцу, 22 чэрвеня.
Сдали с коллегами @vigimadi и @IoannZH документы на регистрацию партии «РОССИЯ БУДУЩЕГО» в Минюст. pic.twitter.com/p3nLzoKbSf
— Соболь Любовь (@SobolLubov) 22 июня 2018 г.
Навальны на сваім Telegram-канале пацвердзіў падачу дакументаў, адзначыўшы, што яны складзеныя «ў ідэальным парадку», а таксама былі праведзеныя федэральны з'езд і неабходная колькасць рэгіянальных канферэнцый. «Думаю, ніхто не можа сказаць, што ў нас недастатковая колькасць сябраў. «Расея Будучыні» - самая масавая з усіх палітычных партый у краіне, калі глядзець на рэальны актыў», - упэўнены палітык.
Партыя «Расея будучыні» была створаная 19 траўня, калі за яе стварэнне прагаласавалі ўсе 124 удзельнікі ўстаноўчага з'езду. Прадстаўляючы праграму партыі, Любоў Собаль заявіла пра неабходнасць дамагацца «рэальных перамен» і «рэальных рэформаў», між іншым, у судовай сферы, а таксама даць гарантыі прыватнай уласнасці і весці барацьбу з карупцыяй. Сам Навальны на мерапрыемстве не прысутнічаў, бо адбываў пакаранне за арганізацыю масавай акцыі ў Маскве 5 траўня.
Назва партыі першапачаткова трымалася ў сакрэце
Назва партыі да апошняга моманту трымалася ў сакрэце, да ўстаноўчага з'езду яна называлася «Працоўная назва». У лютым былы намеснік кіраўніка маскоўскага штаба Навальнага Віталь Серуканаў браў удзел у з'ездзе «Партыі прагрэсу», а затым падаў дакументы на яе рэгістрацыю ў Міністэрства юстыцый за два тыдні да таго, як гэта планавалі зрабіць прыхільнікі Навальнага. Пяццю гадамі раней паліттэхнолаг Андрэй Багданаў пераназваў сваю партыю «Родная краіна» ў «Народны альянс» - так называлася тады незарэгістраваная партыя Навальнага. Пасля гэтага апазіцыянеру давялося змяніць назву сваёй арганізацыі.