Каталіцкія біскупы выступілі ў абарону семінарыстаў
5- 23.05.2018, 12:15
- 8,972
Касцёл накіраваў зварот да ўладаў Беларусі.
Каталіцкія біскупы Беларусі звярнуліся да Лукашэнкі з просьбай разгледзець пытанне аб выдачы адтэрміноўкі ад праходжання вайсковай службы семінарыстам і святарам узросту набору, паведамляе сайт catholic.by.
Яшчэ ў жніўні 2017 года касцёл падаў інфармацыю для надання адтэрміноўкі для святароў і студэнтаў вышэйшых духоўных навучальных устаноў на 2018 год. Аднак у траўні 2018 года семінарысты і святары ўзросту набору пачалі атрымліваць позвы.
- У сувязі з гэтым, а таксама з улікам усё яшчэ недастатковай колькасці мясцовых святароў для работы ў прыходах Беларусі, і прымаючы да ўвагі тое, што ў выпадку прызыву студэнтаў вышэйшыя духоўныя семінарыі не змогуць існаваць, Канферэнцыя Каталіцкіх Біскупаў у Беларусі звярнулася да Лукашэнкі з просьбай разгледзець пытанне аб наданні адтэрміноўкі, - гаворыцца ў паведамленні канферэнцыі каталіцкіх біскупаў Беларусі.
У гэтым годзе позвы ў ваенкамат атрымалі блізу 20 клірыкаў каталіцкай вышэйшай духоўнай семінарыі ў Гародні, некалькі выхаванцаў каталіцкай семінарыі ў Пінску, дзясяткі студэнтаў праваслаўнай духоўнай семінарыі ў Жыровічах. У гэтыя дні навучэнцы праходзяць медыцынскую камісію.
У колах духавенства кажуць, што гэта выключны выпадак. Як правіла, згодна з даручэннем Савета міністраў ад 13 красавіка 2006 года ў рамках падрыхтоўкі праекта ўказу Лукашэнкі Упаўнаважаны ў правах рэлігій і нацыянальнасцяў накіроўвае ў Міністэрства абароны хадайніцтва аб наданні адтэрміноўкі ад набору на тэрміновую службы для святароў і студэнтаў вышэйшых духоўных навучальных устаноў.
Кіраўнік прэс-службы Міністэрства абароны Уладзімір Макараў сказаў «Радыё Свабода», што ўстанова «дзейнічае ў рамках заканадаўства».
«Калі няма падстаў для адтэрміновак, то выклікаюць. І калі, як вы кажаце, кагосьці набіраюць, то ўсё робіцца ў межах заканадаўства», - заявіў Макараў.