На станцыі метро «Парк Чалюскінцаў» закончыўся рамонт

Фотафакт.

Станцыя «Парк Чалюскінцаў» зноў ззяе – закончыўся рамонт.

«Працы вяліся глыбокай ноччу, калі метро зачыненае, закончаны рух цягнікоў, знятае напружанне з кантактнай рэйкі. Усё рабілася для таго, каб не ствараць ніякіх нязручнасцяў пасажырам», – расказалі ў Менскім метрапалітэне.

Што змянілася на станцыі? Па-першае, светлавое абсталяванне – яно цяпер зробленае з выкарыстаннем новых энэргазберагальных тэхналогій. Калі канкрэтна: адмыслоўцы змантавалі святлодыёдныя крыніцы святла, памянялі люстры на столі станцыі і абнавілі падсвятленне сектараў.

Па-другое, станцыю па-новаму пабялілі: выкарыстоўвалі экалагічную акрылавую фарбу.

Сёлета менскаму метро спаўняецца 40 гадоў.

Станцыя «Парк Чалюскінцаў» была ўведзеная ў эксплуатацыю ў 1984 годзе, у першай чарзе з васьмі станцый на сіняй галінцы сталічнай падземкі.

Галоўным яе ўпрыгожаннем сталі дэкаратыўныя свяцільні ў выглядзе сланечнікаў, выкананыя з падсветленага цёмна-жоўтага і карычневага адліванага шкла.

Для афармлення «Парку Чалюскінцаў» спатрэбілася 15 т крышталю і каляровага шкла.