«Нам жа трэба артыстам ганарары плаціць!»

Чаму цэннік на «Ноч музеяў» у Менску даходзіў да 17 рублёў?

19 траўня ва ўсім свеце прайшла акцыя «Ноч музеяў». Тысячы музеяў у Еўропе ў гэтую ноч працавалі ледзь не да раніцы, а паглядзець экспазіцыі можна было бясплатна. Далучылася да яе і Беларусь, праўда, з карэктывамі - раннім закрыццём большасці музеяў і платным уваходам, піша kp.by.

Сёлета «Ноч музеяў» таксама выйшла не з танных: квіткі ў некаторыя музеі каштавалі 15 - 17 рублёў! Тым не менш каля ўваходу стаялі чэргі.

- Кожны год адно і тое ж, - кажа наведвальніца Нацыянальнага мастацкага музея Аліна. - Мала таго што білет сёння каштуе 10 рублёў, дык яшчэ і паўгадзіны ў чарзе стаяць!

«У нас камерцыйная выстава - мы не можам зніжаць кошты»

Трапіць у Гістарычны музей можна было за 9 - 17 рублёў, хоць летась цэннік быў куды больш сціплы - 1 - 3 рублі. Прычына гэткіх высокіх коштаў - выстава «Боская камедыя Сальвадора Далі».

- Гэта звычайныя кошты, паўсядзённыя, - кажа загадчыца аддзела музейных камунікацый Нацыянальнага гістарычнага музея Кацярына Далінская. - Выстава камерцыйная, мы не можам зніжаць кошт, большы працэнт даходу за яе ідзе арганізатарам. Ніхто не гатовы бясплатна пускаць тысячы наведвальнікаў на камерцыйную выставу. А летась Далі ў нас не было, таму і кошты былі нізкімі. Ну і яшчэ ў нас было шмат інтэрактыўных зон, канцэрты гуртоў - а гэта таксама выдаткі.

- Ці акупіцца акцыя сёлета?

- У параўнанні з мінулым годам людзей было менш, але каса атрымалася на тым жа ўзроўні. Мноства людзей прыйшлі ў наш панадворак, дзе можна было паслухаць музыку дарэмна. Дарэчы, у траўні ў нас было два дні, калі наведаць музей можна было бясплатна.

«Былі б спонсары - зрабілі б уваход бясплатным!»

Яшчэ адна навінка цяперашняй «Ночы музеяў» - аб'яднанне чатырох сталічных арт-пляцовак. За 30 рублёў можна было трапіць у культурны цэнтр «Корпус», культурны інкубатар «OK16», Музей-майстэрню З. Азгура і галерэю «Арт-Беларусь». Калі купляць квіткі асобна, выйшла б на 6 рублёў даражэй.

- Цана на ўваходны квіток абумоўлена аб'ёмам інвестыцый, якія ўносіў кожны з бакоў, - кажа куратар карпаратыўнай калекцыі Белгазпрамбанка Аляксандр Зіменка. - Мы дадаткова выдаткавалі грошы на арэнду аўтобуса, які курсаваў паміж арт-пляцоўкамі ўсю ноч, паліграфію і гэтак далей. Зноў жа, выступалі музыкі, іх праца аплачвалася.

Самымі дарагімі пляцоўкамі сталі «OK16» і Музей Азгура. Затое яны працавалі да 6-й раніцы - у лепшых традыцыях еўрапейскіх музеяў. У Музеі Азгура паказвалі фільмы і відэаінсталяцыі, гралі на аргане і арфе. Наведвальнікі нават змаглі трапіць на балет!

- Былі б спонсары, з задавальненнем зрабілі б бясплатны ўваход! Але дзе яны? - кажа дырэктарка Музея-майстэрні З. Азгура Аксана Багданава. - Бюджэт ночы: арэнда абсталявання, транспартныя выдаткі, ганарары артыстам. І ў выніку мы больш уклалі, чым выручылі. Але ўсё роўна рады, што зрабілі добры праект!

«У нас былі валанцёры, якія працавалі бясплатна»

«Толькі 1 раз у год! Толькі 1 ноч! Толькі 1 рубель!» - так прыцягвалі наведвальнікаў у Музей Янкі Купалы ў гэтую ноч. Вось ужо некалькі гадоў запар музей прыцягвае самым нізкім коштам у горадзе: то 1 рубель, то 10 капеек. Пры гэтым у праграме - выступленні музычных гуртоў, гульні, шарады, фотазоны.

- Інтэрактыўныя праграмы распрацаваныя на аснове паэзіі Янкі Купалы. Так супала, што нашы калегі з музея Булгакава з Кіева прывезлі выставу, - распавядае супрацоўніца музея Марыя Барткова. - Мы вырашылі: было б добра, каб у гэты дзень наведвальнікаў сустракалі героі твораў Булгакава. У нас былі валанцёры, якія працуюць дарэмна. Наконт кошту 1 рубель - мы стараемся прытрымлівацца традыцый еўрапейскіх музеяў. Там увогуле ёсць магчымасць пайсці ў музей дарэмна. Але мы робім сімвалічны кошт, каб зручней весці статыстыку, колькі людзей да нас прыйшло.

Тым часам

У Нясвіжскім палацы квіткі ў гэты вечар каштавалі 22,5 рубля. Калі вы не маглі даехаць самі - можна было даплаціць 15 рублёў і адправіцца на спецыяльна арандаваным аўтобусе. У кожнай з заляў наведвальнікаў сустракалі аніматары, якія распавядалі сваю частку экскурсіі, што называецца, ад першай асобы. А ў двары ўсталявалі сцэну, на якой увесь вечар выступалі бард Віктар Шалкевіч, гурт Palladium і «J:Морс» на дэсерт!