У продажы з'явіліся квіткі на новы хуткасны цягнік Менск - Гародня

Глядзіце, як ён выглядае.

З 9 снежня паміж Гародняй і Менскам штодня пачне курсаваць самы хуткі цягнік на гэтым кірунку. На днях сталі вядомыя падрабязнасці, у БЧ распавялі, які цягнік будзе перавозіць пасажыраў і колькі каштавацьме паездка ад канчатковай да канчатковай, піша s13.ru.

Гэта будзе дызель-цягнік PESA ДП3. На сваім шляху ён будзе рабіць усяго тры кароткія прыпынкі - у Мастах, Лідзе і Маладзечне. Час адпраўлення са станцыі Гародня - а 06:39, прыбыццё на станцыю Менск-Пасажырскі - а 10:42. Час адпраўлення са станцыі Менск-Пасажырскі - а 15:30, прыбыццё на станцыю Гародня - а 19:38. Такім чынам, з Менска да Гародні ці наадварот можна будзе дабрацца за чатыры гадзіны і некалькі хвілін.

Квіток на маршрут Гародня - Менск каштавацьме 12 рублёў 21 капейку, што супастаўна з коштам маршруткі. Квіткі ўжо з'явіліся ў продажы.

Дызель-цягнік ДП3 вырабляецца польскай кампаніяй PESA Bydgoszcz SA і ўпершыню пачаў эксплуатавацца ў Беларусі з 2014 года. У ДП3 прадугледжаныя 145 месцаў для сядзення. Цягнік адпавядае сучасным патрабаванням камфорту і якасці. Да паслуг пасажыраў прадстаўленыя зручныя салоны, мяккія крэслы з індывідуальнымі рэгуляваннямі становішча спінкі крэсла і падлакотнікаў. Сярод пераваг цягніка - усталяваная ў кожным вагоне сістэма кандыцыянавання паветра; прылада цеплавых завес уваходных дзвярэй, якая перашкаджае паступленню халоднага паветра звонку і выхаду цёплага паветра з салонаў; паніжаная падлога (600 мм), якая дазваляе хутка ажыццяўляць пасадку і высадку пасажыраў. Дзверы абсталяваныя высоўнымі прыступкамі.