4 августа 2020, вторник, 11:16
Сим сим, Хартия 97!
Рубрики

У Кіеве прайшла акцыя салідарнасьці зь беларусамі

У Кіеве прайшла акцыя салідарнасьці зь беларусамі
Фото: «Радыё Свабода»

Беларускія і ўкраінскія актывісты на Крашчаціку стварылі ланцуг салідарнасьці.

У Кіеве акцыя салідарнасьці зь Беларусьсю пачалася з ушанаваньня памяці Міхася Жызьнеўскага, які загінуў на пачатку 2014 года ў часе масавых акцыяў пратэсту, паведамляе «Радыё Свабода» .

Пасьля хвіліны маўчаньня ля помніка Міхасю Жызьнеўскаму на вуліцы Грушэўскага беларускія і ўкраінскія актывісты накіраваліся на майдан Незалежнасьці, дзе спачатку правялі невялікае веча, а потым на Крашчаціку стварылі ланцуг салідарнасьці.

Фото: «Радыё Свабода»

«26 гадоў Лукашэнка ўтрымлівае ўладу пры падтрыманьні Масквы. Беларусы выходзяць на вуліцы пад бел-чырвона-белымі сьцягамі, каб сказаць, што маюць права жыць у вольнай, незалежнай і дэмакратычнай краіне. Сёньня па ўсім сьвеце праходзяць акцыі салідарнасьці з народам Беларусі», — сказала сустаршыня Руху салідарнасьці «Разам» Алена Талстая, зьвяртаючыся да ўкраінцаў.

Фото: «Радыё Свабода»

Упершыню ў акцыі салідарнасьці ў Кіеве ўдзельнічаў Улад Рымашэўскі — выпускнік менскай гімназіі N 192, які на выпускной лінейцы заявіў, што спадзяецца на перамены пасьля выбараў. Ён зараз з бацькамі і братам знаходзіцца ва Ўкраіне, але, паводле яго, яны плянуюць вярнуцца ў Беларусь найбліжэйшым часам.

«26 гадоў мы знаходзімся ў руках Лукашэнкі, і гэта трэба мяняць. І калі мы зараз нічога ня зробім, то потым будзе яшчэ горш», — сказаў Улад, выступаючы на мітынгу.

Фото: «Радыё Свабода»

Украінская журналістка Наталка Пазьняк мяркуе, што ўпершыню за апошнія гады хваля незадаволенасьці і жаданьня пераменаў стала ў Беларусі ўсенароднай.

«У нас доўгі час існаваў такі міт і шмат хто зайздросьціў Беларусі і беларусам, што Лукашэнка захаваў Савецкі Саюз. Але зараз мы бачым, што гэты Савецкі Саюз ня столькі ўмоўна бясплатная мэдыцына, гарантаваная праца за мінімальны заробак, але гэта таксама і рэпрэсіі і прыдушэньне іншай думкі. Мы тут, каб паказаць, што мы разам зь беларусамі».

Фото: «Радыё Свабода»

Кіраўнік Беларускага інфармацыйнага цэнтру, вядомы ўкраінскі літаратар Аляксандар Ірванец спадзяецца, што «выбары ў Беларусі адбудуцца мірна і бяскроўна, а беларускаму кіраўніку Лукашэнку хопіць розуму не накіроўваць свае праваахоўныя органы супраць мірных людзей», і заклікаў украінцаў падпісаць ліст на падтрымку беларусаў.

«Паводзіны існуючага ў Беларусі рэжыму супярэчаць міжнародным абавязаньням краіны ў дэмакратыі і правядзеньні выбараў. Міжнародная супольнасьць ня мае права ігнараваць грубыя парушэньні правоў чалавека і асноўных свабодаў. Мы выказваем падтрымку народу Беларусі, які патрабуе паважаць свае правы і свабоды і выступае за свабодныя і справядлівыя выбары.

Фото: «Радыё Свабода»

Мы патрабуем тэрміновага і безумоўнага вызваленьня ўсіх затрыманых і арыштаваных паводле палітычных матываў. Мы настойліва патрабуем ад улады Беларусі вярнуць людзям вольныя і справядлівыя выбары адпаведна міжнародным стандартам, якіх яны пазбаўлены трывалы час. Мы таксама настойліва заклікаем уладу Беларусі выконваць міжнародныя абавязаньні аб забесьпячэньні вольных сходаў, свабоды выказваньняў і слова, спыніць блякаваньне незалежных СМІ, спыніць запужваньне журналістаў і пакласьці край палітычна матываваным перасьледам. Мы асуджаем эскаляцыю паліцэйскага гвалту супраць мірных сходаў, журналістаў і звычайных грамадзян, і папярэджваем беларускую ўладу пра недапушчальнасьць выкарыстаньня гвалту ў часе цяперашняй палітычнай кампаніі», — адзначаецца ў лісьце.

Фото: «Радыё Свабода»

Калі ўдзельнікі ўтварылі ланцуг салідарнасьці на Крашчаціку, кіроўцы машын, што спыняліся на чырвонае сьвятло, падтрымлівалі актывістаў сыгналамі клаксонаў.

У Кіеве акцыі салідарнасьці зь Беларусьсю праходзяць рэгулярна цягам апошняга месяца. На пачатку кожнага тыдня ў цэнтры ўкраінскай сталіцы ля беларускіх пікетаў украінцы могуць напісаць лісты беларускім палітвязьням.

Трэцяга ліпеня, калі ў Беларусі адзначаўся Дзень Рэспублікі, у Вярхоўнай Радзе Ўкраіны каля 20 дэпутатаў стварылі міжфракцыйнае аб’яднаньне «За дэмакратычную Беларусь». Пазьней грамадзкія актывісты абвясьцілі пра стварэньне Беларускага інфармацыйнага цэнтру.