16 июня 2019, воскресенье, 2:52
Мы в одной лодке
Рубрики

Беларусы адновяць і Курапацкія крыжы

4
Віктар Сазонаў

Гэта бітва паміж дабром і злом за людскія душы.

На Беларусі апошнімі днямі стала яшчэ менш крыжоў. Іх бессаромна і нахабна выдзіраюць з беларускай зямлі. Выдзіраюць прама з грудзей і сэрцаў ні ў чым не вінаватых закатаваных нашых суайчыннікаў, якія пакояцца ў Курапатах. Выдзіраюць з сэрцаў і душаў кажнага жывога беларуса, спрабуючы зруйнаваць у яго свядомасці гістарычную памяць, прагу да супрацьстаяння злу, любоў да свайго і сваіх, любоў да праўды і справядлівасці.

Гэта не першы раз у лёсе нашай нацыі. Знішчалі крыжы і раней. Руйнавалі цэрквы і касцёлы, змагаліся з крыжам як з сімвалам хрысціянства, і як з сімвалам нашай беларускай прыналежнасці да вялікай еўрапейскай супольнасці, і як з верай у вызваленне ад нашага чалавечага граху. Увогуле, як з верай у вызваленне.

Але да могілкаў яшчэ былі не дабраліся.

Дабраліся зараз.

Знішчэнне крыжа на месцы масавага захаранення людзей, на могілках, гэта сімвал нашага часу.

І гэтыя чорныя рытуалы на магілах нашых продкаў мала назваць вандалізмам. Гэта бітва. І не простая бітва ў яе класічным разуменні, дзе ёсць хоць нейкія правілы і дзе непрыяцеля таксама можна пастарацца зразумець.

Гэта бітва паміж дабром і злом за людскія душы.

Тут няма сярэдзіны.

Або ты па той бок, або па гэты.

У Курапатах стаялі крыжы ў памяць пра нявінна забітых людзей. Зараз мы вымушаныя паставіць крыжы ў памяць знесеных крыжоў у Курапатах. І беларусы гэта зробяць. І ў свой час адновяць і Курапацкія крыжы.

Але пачаць трэба з таго, каб паставіць крыж у сваім сэрцы.

Адтуль яго выдзерці найцяжэй.

Віктар Сазонаў, «Гарадзенская вясна»

Нагадаем, партыя «Народная Грамада», якая ўваходзіць у Беларускі Нацыянальны Кангрэс, заклікала да новага малебну «Вызвалі нас ад лукавага» 15 красавіка а 18.00 каля адміністрацыі Лукашэнкі (Менск, вуліца Карла Маркса, 38).

4 красавіка ўлады знішчылі крыжы па перыметры Курапатаў.

Актывісты паведамляюць, што было знесена і вывезена блізу 100 крыжоў.

1 сакавіка на прэс-канферэнцыі Лукашэнка выказаў незадаволенасць крыжамі вакол Курапатаў, якія бачныя з дарогі.

На заклік аднаго з лідараў Беларускага Нацыянальнага Кангрэсу Мікалая Статкевіча ў цэнтры Менску адбыўся малебен, у якім узялі ўдзел блізу 1000 чалавек.

Заклік падтрымаў сустаршыня БХД Павел Севярынец.

12 красавіка ўлады зноў знішчылі 50 крыжоў па перыметры Курапатаў.