У Расіі масава арыштоўваюць высокапастаўленых чыноўнікаў

Устаноўлены рэкорд як мінімум за апошнія дзесяць гадоў.

У 2025 годзе Расія сутыкнулася з беспрэцэдэнтным ростам колькасці крымінальных спраў супраць высокапастаўленых чыноўнікаў. Паводле падлікаў «Новая газета Еўропа», з пачатку года арыштавана 155 прадстаўнікоў улады, што перавышае паказчыкі ўсяго 2024 года, калі былі затрыманыя 122 чыноўнікі. У параўнанні з папярэднімі перыядамі паказчыкі дэманструюць больш рэзкі рост: у 2023 годзе арыштавалі 73 чыноўнікаў, а ў 2022-м — усяго 33.

Асабліва інтэнсіўным стаў перыяд з жніўня па сярэдзіну кастрычніка бягучага года, калі былі затрыманыя больш за 50 высокапастаўленых чыноўнікаў і дэпутатаў, уключаючы чатырох віцэ-губернатараў і восем міністраў. Сярод арыштаваных — былы віцэ-губернатар Свярдлоўскай вобласці Алег Чэмязаў і экс-віцэ-губернатар Краснадарскага краю Аляксандр Уласаў. Абодва пакінулі свае пасады непасрэдна перад затрыманнем.

У спісе арыштаваных таксама значацца экс-міністр аховы здароўя Дагестана Таццяна Бяляева, мэр Уладзіміра Дзмітрый Наумаў, начальнік упраўлення Расгвардыі па Паўночнай Асетыі Валерый Галота і былы кіраўнік Архангельскага Мінздароўя Аляксандр Герштанскі.

Частка крымінальных спраў звязана з ваеннай тэматыкай. Так, в.а. віцэ-губернатара Курскай вобласці Уладзімір Базараў падазраецца ў крадзяжах пры будаўніцтве фартыфікацыйных збудаванняў на мяжы з Украінай. Начальнік вайсковага прадстаўніцтва Мінабароны Андрэй Цюрын абвінавачваецца ў зрыве абароннай замовы, што нанесла шкоду на 40 млн рублёў. Былы віцэ-губернатар Краснадарскага краю Аляксандр Уласаў быў затрыманы па падазрэнні ў крадзяжы гуманітарнай дапамогі, прызначанай для вайскоўцаў, якія ўдзельнічаюць у ўварванні ва Украіну.

Тэмпы арыштаў працягваюць расці: калі ў першай палове года ў сярэднім узбуджалася 14 спраў на месяц, то ў другой палове гэты паказчык дасягнуў 20 спраў. Найбольшая колькасць арыштаў прыпадае на сілавікоў (32%), затым ідуць чыноўнікі са сферы будаўніцтва і ЖКГ (21%) і транспартнай галіны (14%). Далей ідуць эканоміка (8%) і сфера прыродакарыстання і сельскай гаспадаркі (7%).

Як адзначае навуковая супрацоўніца Берлінскага цэнтра Карнегі Таццяна Становая, «якім бы лаяльным і давераным ні быў персанаж, гэта ўжо не абараняе ад арышту, бо неляяльных і недавераных у сістэме ўсё адно не засталося».

У статыстыку ўключаныя чыноўнікі ўзроўню не ніжэй за намеснікаў кіраўнікоў рэгіянальных міністэрстваў, сенатары, дэпутаты федэральнага і рэгіянальнага ўзроўняў, а таксама мэры рэгіянальных сталіц. Дадзеныя сабраныя з адкрытых крыніц; кіраўнікі дзяржаўных прадпрыемстваў у разлік не прымаліся, адзначае выданне.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]