Лукашэнка заклікае СНД да эканамічнай ізаляцыі

Дыктатар прапанаваў закрыць рынкі і пускаць «толькі тых, каго захочам».

Тануць у адзіночку сумна. Нават калі танеш разам з найбліжэйшым саюзнікам. А калі тануць усе, тады ўжо не так крыўдна. Таму на саміце СНД у Душанбэ Лукашэнка зноў пераконваў калег, што ім ад яго і Пуціна няма куды падзецца. І прасіў абараніць беларускія тавары ад замежнай канкурэнцыі, піша «План Б».

«Трэба зрабіць так, каб у нашу эканамічную прастору маглі зайсці толькі тыя, каго мы сюды пусцім», — экспромтам сказаў Лукашэнка, зачытваючы тэкст з паперкі.

Сказаў, выступаючы перад прэзідэнтамі Азербайджана, Казахстана, Кыргызстана, Расіі, Таджыкістана, Туркменістана, Узбекістана і прэм’ер-міністрам Арменіі. Заадно зноў растлумачыў, што «нас больш нідзе не чакаюць», і прапанаваў аднавіць агульны рынак, які калісьці існаваў у Савецкім Саюзе.

«Калі мы выпрацуем гэтую агульную стратэгію, мы адновім нашу эканамічную прастору».

Праўда, не стаў тлумачыць, навошта гэта трэба ўсім астатнім. І, напэўна, правільна зрабіў. Бо з усіх прысутных лозунг «нас нідзе не чакаюць» актуальны толькі для лукашэнкаўскага саюзніка Пуціна. Ім сапраўды няма асабліва куды падзецца адно ад аднаго. А ўсім астатнім — ёсць куды. І яны робяць гэта з вялікім энтузіязмам.

Для Кыргызстана асноўным гандлёвым партнёрам з’яўляецца Кітай. У гандлі Казахстана больш за палову прыпадае на Еўрасаюз. Азербайджан пастаўляе 40 працэнтаў экспарту ў Італію, яшчэ 14–16 працэнтаў — у Турцыю, і толькі чатыры працэнты — у Расію.

Таму прапанова абараніць свае рынкі ад галоўных гандлёвых партнёраў, каб Лукашэнку было куды дзяваць трактары, наўрад ці прагучала прывабна. Ды нават саюзная Расія, нягледзячы на заклікі Лукашэнкі, не рвецца закрываць свой рынак, каб беларускім таварам было на ім больш камфортна.

Праўда, уголас ніхто з лідараў СНД ідэю не каментаваў. Але, падаецца, невербальны адказ на свае ініцыятывы ён усё ж такі атрымаў. У першы дзень візіту з Лукашэнкам сустрэўся толькі прэзідэнт Таджыкістана Эмомалі Рахмон. Але таму, як гаспадару саміту, ад Лукашэнкі сапраўды не было куды падзецца.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]