Сіноптыкі паабяцалі беларусам «залатую восень» да 1 кастрычніка

Стала вядома, дзе на наступным тыдні прагрэе да +28°C.

Дажджы, якія накрылі большую частку Беларусі ў выхадныя, ужо ў пачатку наступнага тыдня зменіць сухое і памяркоўна цёплае надвор'е, папярэдзілі метэаролагі. Згодна з прагнозам беларускага сіноптыка Дзмітрыя Рабава, з 25 верасня да 1 кастрычніка на тэрыторыі краіны ўсталюецца "залатая восень", а ў асобных рэгіёнах дзённая тэмпература будзе дасягаць +28°C.

"Бабіна лета, хоць і не такое цёплае, зноў вернецца", – заявіў Дзмітры Рабаў у эфіры дзяржтэлеканала ОНТ. Ён расказаў, што на апошнім тыдні верасня асноўным надвор’еўтваральным чыннікам стануць "шырокія, пагодлівыя, блакавальныя антыцыклоны".

"Гэта значыць, што нас чакаюць халодныя туманныя ранішнікі і залітыя сонцам памяркоўна цёплыя, сухія дні", – растлумачыў сіноптык.

Нягледзячы на паступовае паніжэнне сярэднясутачнай тэмпературы, да 1 кастрычніка яна па-ранейшаму будзе вышэйшай за кліматычную норму – прыкладна на 5°C, заявіў Рабаў.

Паводле звестак Белгідраметцэнтра, у панядзелак, 25 верасня, надвор'е ў Беларусі будзе абумоўлена сфармаваным у прахалоднай паветранай масе заходнееўрапейскім антыцыклонам, цэнтр якога размесціцца над тэрыторыяй Літвы.

«Ссоўваючыся праз нашу краіну, ён прынясе пераменную воблачнасць. Без ападкаў, толькі ў панядзелак ноччу і раніцай па паўднёвым усходзе – кароткачасовыя дажджы», – растлумачыў Рабаў. Паводле ягоных словаў, начная тэмпература ў краіне будзе вагацца ад +7 да +12°C, дзённая – ад +17°C да +22°C. Ужо да аўторка, 26 верасня, прыкметна пацяплее – па Віцебскай вобласці днём паветра прагрэецца да +20°C, па Берасцейскай – да +28°C.

У сераду, 27 верасня, цёплыя паветраныя масы з паўднёвых шыротаў забяспечаць сухое і цёплае надвор'е: ноччу тэмпература па краіне будзе вагацца ад +7°C да +12°C, днём – ад +23°C да +28°C.

Сонечны, сухі і цёплы антыцыклон, цэнтр якога, як мяркуецца, размесціцца над Цэнтральнымі рэгіёнамі Расеі, будзе спрыяць адсутнасці дажджоў і ў чацвер і пятніцу, 28 і 29 верасня. Начная тэмпература гэтымі днямі складзе +9°C… +15°C, днём у чацвер па краіне – ад +24°C да +27°C, у пятніцу крыху халадней – не больш за +23°C.

Паводле папярэдняга прагнозу сіноптыкаў, у наступныя выходныя прыкметна пахаладае, але па-ранейшаму будзе пераважна суха і без ападкаў. Усё праз больш прахалоднае паветра, якое пачне паступаць у Беларусь з Балтыйскага мора. Уначы ў суботу і нядзелю, 30 верасня і 1 кастрычніка, слупкі тэрмометраў, як мяркуецца, апусцяцца да +7°C… +13°C, а днём падымуцца не вышэй за +11°C… +14°C у суботу і +10°C (па Віцебскай вобласці) і +18°C (па Гарадзенскай вобласці) у нядзелю.