Экспарт расейскага золата мог абрынуцца амаль утрая за год пасля пачатку вайны

Даходы золатаздабыўных кампаній абрынуліся.

Да вайны ва Украіне расейскае золата адпраўлялася ў Лондан і часткова - у Швэйцарыю. Пасля ўварвання і ўвядзення заходніх санкцый галоўным цэнтрам гандлю ім сталі Аб'яднаныя Арабскія Эміраты, сведчаць атрыманыя Reuters звесткі аб замежнагандлёвых аперацыях.

Дакументы расейскай мытні змяшчаюць звесткі ўвогуле амаль пра 1000 партый, адпраўленых за мяжу ў перыяд з 24 лютага 2022 г. да 3 сакавіка 2023 г. З наяўных звестак вынікае, што ААЭ імпартавалі 75,7 тоны расейскага золата коштам $4,3 млрд.

Гэта ў 58 разоў больш, чым у 2021 г., калі ААЭ завезлі ўсяго 1,3 тоны.

Двума іншымі імпарцёрамі расейскага золата сталі Кітай і Турцыя, якія набылі блізу 20 тон. У сукупнасці на тры краіны прыпала 99,8% паставак за першы год пасля пачатку вайны.

Увогуле за год пасля пачатку вайны з Расеі было вывезена 116,3 тоны золата, паводле інфармацыі Reuters. Гэта амаль утрая менш, чым у даваенным 2021 г., калі экспарт, паводле інфармацыі Саюза золатапрамыслоўцаў Расеі, склаў 302 тоны на суму $17,4 млрд. (Праўда, Reuters папярэджвае, што можа валодаць не ўсімі звесткамі аб экспарце.) Галоўным пакупніком тады была Вялікая Брытанія - амаль 266 тон на $15,4 млрд.

Вытворчасць золата ў 2021 г., паводле інфармацыі саюза, склала 363,5 тоны. Інфармацыі за 2022 г. ён не прыводзіць, Расстат жа паведаміў толькі аб адноснай змене – росце на 2,4%. На адзнаку кансалтынгавай кампаніі Metals Focus, вытворчасць у 2022 г. склала 325 тон.

Даходы золатаздабыўной кампаній абрынуліся летась не толькі праз скарачэнне экспарту. Кошт золата на сусветным рынку, нягледзячы на скачок пасля пачатку вайны, за 2022 г. практычна не змяніўся. Але праз рост валютнага курсу рублёвы даход ад продажу грама металу ўпаў амаль на 30%, рэнтабельнасць многіх прадпрыемстваў стала практычна нулявой, адзначаў Саюз золатапрамыслоўцаў.

Неабходнасць перанакіроўваць пастаўкі па новых маршрутах таксама б'е па кішэні золатаздабывальнікаў - хоць і не так моцна, як па кішэні нафтавікоў, у якіх дысконт па нафце Urals часам перавышаў летась 30% да Brent. Прадстаўнік адной кампаніі, якая за апошні год перавезла вялікія аб'ёмы расейскага золата, сказаў Reuters, што прадаўцы прапануюць яго са скідкай 1% ад сусветнага кошту, каб стымуляваць гандаль.

З яго слоў, у асноўным пастаўленае ім у ААЭ золата прызначанае для пераплаўкі.

Дубай - буйны цэнтр гандлю каштоўнымі металамі паміж Усходам і Захадам. Некаторыя фірмы, якія закупляюць расейскую прадукцыю, маюць офісы на дубайскім залатым базары, пісаў Bloomberg, які таксама прааналізаваў расейскія мытныя звесткі (на жнівень 2022 г.), іншыя заняліся прыбытковым бізнэсам упершыню. Reuters выявіў больш за 100 нерасейскіх кампаній, якія гандлявалі расейскім золатам цягам года пасля пачатку вайны. Да гэтага аперацыі праводзілі ў асноўным такія гіганты рынку, як банкі JPMorgan Chase і HSBC, і заходнія фірмы Brink's і Loomis, якія спецыялізуюцца на перавозцы каштоўных металаў.

Найбуйнейшым пастаўшчыком золата ў ААЭ, паводле інфармацыі Reuters, апынулася Temis Luxury Middle East, дубайская «дачка» французскай лагістычнай кампаніі Temis Luxury, - 15,6 тоны на $ 863 млн. Санкцыі ЕЗ звычайна не ўжываюцца да замежных «дачок» еўрапейскіх кампаній, адзначае Тэн Альбайрак, санкцыйны юрыст Reed Smith у Лондане. Temis Luxury заявіла Reuters, што прытрымліваецца ўсіх законаў ААЭ.

У Ганконгу, праз які ў асноўным ідуць кітайскія пастаўкі, найбуйнейшым імпарцёрам была кітайская кампанія Vpower Finance Security Hong Kong – 20,5 тоны на $ 1,2 млрд. У Турцыі ніводная кампанія не імпартавала больш за некалькі тон.