У Беларусі чарговы раз зніжаюць стаўку рэфінансавання

Гэта ўжо пятае зніжэнне гэтага паказчыка за гэты год.

З 31 траўня ў Беларусі чарговы раз знізяць стаўку рэфінансавання - з 10 да 9,75% гадавых. Пра гэта паведамляе Нацбанк. Гэта ўжо пятае зніжэнне гэтага паказчыка за гэты год.

З 31 траўня таксама знізяць стаўку на крэдыт овэрнайт - з 11 да 10,75% гадавых, стаўка на дэпазіт овэрнайт - з 9 да 8,75% гадавых.

«Нізкія месячныя тэмпы прыросту спажывецкіх цэн абумоўліваюць захаванне тэндэнцыі на запаволенне гадавой інфляцыі. У красавіку 2023 года яна склала 4,7% супраць 6% месяцам раней. Асноўныя кампаненты індэксу спажывецкіх цэн дэманструюць запаволенне. Гадавая базавая інфляцыя знізілася да 4,6 з 5,6% у папярэднім месяцы, трэндавая інфляцыя - да 4,6 з 6», - тлумачыць рэгулятар.

У Нацбанку чакаюць у наступныя месяцы захаванне нізкіх месячных тэмпаў прыросту спажывецкіх цэн. Паказчык гадавой інфляцыі будзе знаходзіцца ніжэй за 5%.