«Пасля стэндапу старшыні выканкама на БелАЗе мы вельмі добра пасмяяліся»

Жодзінскае начальства замітусілася праз новыя санкцыі ЗША.

Міністэрства фінансаў ЗША ўнесла ў санкцыйныя спісы ААТ «Беларускі аўтамабільны завод», ААТ «Менскі аўтамабільны завод», а таксама дзевяць грамадзян Беларусі, сем з якіх - сябры Цэнтральнай выбарчай камісіі. У спісе асоб, на якія накладзены рэстрыкцыі - і генеральныя дырэктары МАЗа і БелАЗа.

Пра першую рэакцыю жодзінцаў на гэтую навіну ex-press.by напісаў чытач: «Учора была прафзвязная канферэнцыя БелАЗа. Там мы ўсе і даведаліся пра санкцыі ў дачыненні да БелАЗа і гендырэктара Сяргея Нікіфаравіча. Даведаліся ад старшыні выканкама - Дзмітрыя Заблоцкага. Ён выступаў і сказаў, што мы зараз павінны ўсе згуртавацца вакол нашага кіраўніцтва. А санкцыі супраць нас - гэта таму, што нас увесь свет баіцца.

Хацелася рагатаць... Але наогул, вядома, страшна... Таму што атмасфера, калі ўсе за ўсімі сочаць, здаюць, даносяць адзін на аднаго - яна на БелАЗе ўсюды. Сапраўды, нас можна баяцца гэтаму свету. Але і маўчаць немагчыма, таму і пішу ананімна».

«Пасля канферэнцыі, мы вельмі добра пасмяяліся. А гэты стэндап ад Заблоцкага, поўны розных перлаў, запомнім надоўга», - паведаміў жодзінец.

Нагадаем, 21 чэрвеня 2021 года Еўрапейскі звяз увёў сектаральныя санкцыі супраць Беларусі. Пад іх патрапіў і БелАЗ. ЕЗ абазначыў жодзінскі аўтагігант, як крыніцу значных даходаў для рэжыму, да таго ж адказную за рэпрэсіі супраць грамадзянскай супольнасці.

У сваім рашэнні Еўрапейская рада адзначыла, што ААТ «БЕЛАЗ» падала свае памяшканні і абсталяванне для правядзення палітычнай акцыі ў падтрымку рэжыму, а супрацоўнікаў, якія ўдзельнічалі ў забастоўках і мірных акцыях пратэсту, застрашвала і пагражала ім звальненнямі. Напрыклад, група людзей была закрытая ў памяшканні, каб не дапусціць яе далучэння да іншых удзельнікаў акцыі. Кіраўніцтва кампаніі падала СМІ забастоўку як вытворчы сход.