Пуцін упершыню прызнаў, што ягонаму войску ва Украіне «сёе-тое не ўдаецца»

Нечаканая заява прагучала на галоўным прапагандысцкім канале РФ.

Расейскі прэзідэнт Уладзімір Пуцін ужо перастаў расказваць казкі аб тым, што ва Украіне ў яго нібыта «ўсё ідзе згодна з планам».

Ён упершыню публічна прызнаў, што ў УС РФ абмежаваныя магчымасці і ёсць няўдачы на фронце. Гучная заява кіраўніка РФ выйшла раніцай 26 сакавіка на федэральным канале «Расея 1» у эфіры прапагандысцкай перадачы «Масква. Крэмль. Пуцін», паведамляе dialog.ua.

Пытанне падняў крамлёўскі прапагандыст Павел Зарубін, адзначыўшы, што няздольнасць УС РФ знішчаць заходнюю тэхніку ва Украіне хвалюе велізарную колькасць расейцаў.

«Уся гэтая вайсковая тэхніка, сістэмы залпавага агню, тыя ж танкі, яны ж да лініі баявога судотыку неяк даязджаюць. Чаму яны даязджаюць? Чаму немагчыма на далёкіх подступах неяк з імі разабрацца?» - пытаў прапагандыст.

Пуцін прызнаў, што магчымасці расейскага войска ў гэтым пытанні абмежаваныя. Вінаваціў ён у гэтым «дрэнных» украінцаў, якія не жадаюць падстаўляць сваю тэхніку пад удар і ў рэжыме сакрэтнасці ажыццяўляюць перакідку.

«Нешта ўдаецца зрабіць нашым вайскоўцам, а нешта - не. Перавозяць (УСУ тэхніку - рэд.) схавана, па начах. Але нешта ўдаецца зрабіць. Тое, што ўдаецца, дастаюць. Але такая цэль, вядома, ёсць. Ні ў кага не павінна быць сумневаў, што да гэтага ставяцца абыякава, праз рукавы. Не, вядома», - спрабаваў запэўніць Пуцін.

У цэлым назіраецца прыкметная змена рыторыкі кіраўніка РФ. Смехатворных размоў аб тым, што вайна нібыта ідзе па плане, ужо няма. Не ўзгадвае дыктатар і пра свае нядаўнія пагрозы «пстрыкаць, як арэшкі» заходнюю тэхніку, якая пастаўляецца Украіне.