Беларускія банкі ўвялі змены з валютнымі аперацыямі

Частка з іх тычыцца кітайскіх юаняў.

Некаторыя банкі ўводзяць змены ў аперацыях, звязаных з валютай, паведамляе zerkalo.io.

"БНБ-Банк" з 24 сакавіка прыпыніў прыём тэрміновых безадклікальных укладаў у далярах на 3 і 6 месяцаў ад фізічных асоб. Умовы на астатніх дэпазітах застаюцца ранейшымі, удакладняюць у банку.

"Парытэтбанк" з 24 сакавіка скасаваў устаноўленыя раней абмежаванні на максімальную суму выдачы гатовых грошай у далярах і еўрах з разліковых рахункаў фізічных асоб. У 2022 годзе банк уводзіў ліміты на выдачу гатовай валюты на ўзроўні да 3 000 даляраў або еўраў на працягу 30 каляндарных дзён.

"Тэхнабанк" абвясціў, што часова спыніў адпраўляць валютныя пераводы ў далярах па сістэме "Залатая Карона". Абмежаванні дзейнічае з 21 да 27 сакавіка.

"БНБ-Банк" з 3 красавіка зменіць валюту разлікаў з міжнароднай аплатнай сістэмай Mastercard з еўра на кітайскія юані. “На гэтую навіну важна звярнуць увагу тым трымальнікам картак “БНБ-Банка”, хто здзяйсняе плацяжы або плануе разлічвацца картамі аплатнай сістэмы Mastercard за тавары ці паслугі, кошт якіх заяўлены ў валюце, якая адрозніваецца ад валюты рахунку карткі, - тлумачыць банк. - Сума да блакавання праходзіць этап канверсіі ўнутраным курсам банка-эмітэнта (у гэтым выпадку – “БНБ-Банка”), а ў шэрагу выпадкаў - двойчы: і курсам банка, і па курсам аплатнай сістэмы”.

У фінустанове ўдакладняюць, што гэтая змена не закране тых, хто аплачвае карткай у замежнай валюце тавары ці паслугі ў беларускіх рублях на тэрыторыі нашай краіны. "Валюта не будзе праходзіць праз пасрэдніка ў выглядзе кітайскіх юаняў", — удакладняюць у "БНБ-Банку".

"Альфа Банк" з 20 сакавіка ўвёў магчымасць для прэміяльных кліентаў A-Private адкрываць рахунак у кітайскіх юанях.