Навукоўцы прапанавалі $250 тысяч за расшыфроўку старажытных скруткаў Геркуланума

Аб'яўлены глабальны конкурс.

Вывяржэнне Везувія ў 79 годзе нашай эры знішчыла Пампеі і найбліжэйшы Геркуланум. Пасля гэтага ў бібліятэцы мясцовай вілы засталіся сотні абвугленых старажытных скруткаў, піша The Guardian.

У наш час навукоўцы змаглі прачытаць частку тэксту ва ўтоеных пластах скруткаў, навучыўшы алгарытм машыннага навучання. Ён выяўляў тонкія адрозненні ў структуры папірусу, зафіксаваныя рэнтгенаўскім здымкам.

«Мы паказалі, як чытаць чарнілы Геркуланума. Гэта дае нам магчымасць раскрыць 50, 70, магчыма, 80% усёй калекцыі. Мы пабудавалі лодку. Цяпер мы хочам, каб усе падняліся і плылі разам з намі», - сказаў прафесар Брэнт Сілз.

Цяпер навукоўцы запускаюць глабальны конкурс на чытанне гэтых тэкстаў з дапамогай штучнага інтэлекту. Навукова-даследчыя групы, якія змогуць паскорыць дэкадаванне, атрымаюць 250 000 даляраў ЗША.

Большасць скруткаў Геркуланума, прааналізаваных дагэтуль, напісаны на старажытнагрэцкай мове, але некаторыя з іх могуць утрымліваць лацінскія тэксты. Таксама сярод іх могуць быць вершы Сапфо, трактаты Марка Антонія ці сведчанні ранняй хрысціянскай філасофіі.