ЗША маюць намер перацяць імпарт расейскага алюмінію з дапамогай мытаў на 200%

Такія высокія тарыфы фактычна спыняць пастаўкі расейскага алюмінію ў ЗША.

Улады ЗША могуць спыніць пастаўкі расейскага алюмінію ў краіну - штаты могуць увесці мыту на 200% на імпарт металу з Расеі, піша Bloomberg са спасылкай на дасведчаныя крыніцы. Так ЗША маюць намер ціснуць на Маскву ў сувязі з набліжэннем гадавіны ўварвання ва Украіну.

Такія высокія тарыфы фактычна спыняць пастаўкі расейскага алюмінію ў ЗША, паказвае агенцтва. Канчатковая пастанова яшчэ не прынятая, прэзідэнт Джо Байдэн яшчэ не даў афіцыйнага дазволу на гэтае дзеянне, адзначае суразмоўца выдання. Белы дом непакоіцца, што абмежаванне паставак нанясе шкоду аэракасмічнай і аўтамабільнай галінам.

Улады ЗША разглядаюць увядзенне мыт на імпарт алюмінію ўжо некалькі месяцаў. Адзіны вытворца алюмінію ў Расеі - "Русал", які належыць холдынгу EN+, які заснаваў алігарх Алег Дзерыпаска. "Русал" – другая ў свеце кампанія ў вытворчасці алюмінію, пры гэтым для ЗША імпарт гэтага металу з Расеі традыцыйна складае 10% ад агульнай дзелі паставак.

Аднак у кастрычніку імпарт алюмінію з Расеі ў ЗША ўпаў да крыху больш як 3%. Тады Bloomberg паведамляў, што Белы дом абдумвае поўную забарону на імпарт расейскага металу. Навіна ўстурбавала амерыканскіх імпарцёраў, якія пастанавілі паступова адмаўляцца ад расейскага алюмінію. Пры гэтым агулам пастаўкі металу ў Штаты выраслі да 11, 6 тысяч тон у лістападзе і амаль да 11 тысяч тон у снежні, адзначае агенцтва.

Попыт на расейскі метал у ЗША паступова зніжаўся яшчэ і з-за таго, што алюмініевыя кампаніі з Еўропы пераносілі вытворчасць на тэрыторыю Штатаў, насычаючы рынак металам мясцовай вытворчасці, адзначылі аналітыкі Прамсувязьбанка.

ЗША ўжо ўводзілі санкцыі супраць EN+ і "Русала" ў 2018 годзе, у тым жа годзе пад абмежаванні трапіў і сам Дзерыпаска. Аднак пазней Мінфін ЗША скасаваў пастанову аб санкцыях супраць кампаній пасля таго, як Дзерыпаска пагадзіўся на рэструктурызацыю кіравання гэтымі актывамі.

Калі ЗША абмяжуюць імпарт алюмінію, Расея можа перанакіраваць яго экспарт у Кітай, піша Bloomberg. Раней Масква таксама перанакіравала экспарт нафты, аднак краіны Азіі, пераважна Кітай, Індыя і Турцыя, закупляюць яе з істотным дысконтам.

У студзені нафтагазавыя даходы Расеі ўпалі на 46 адсоткаў год да года, а агульныя даходы ўпалі на 35 адсоткаў, паведаміў Мінфін. У выніку дэфіцыт бюджэту за першы месяц 2023 года склаў Br1,7 трлн.