Штурмавая брыгада УСУ «зачысціла» ад войскаў РФ плацдарм пад Бахмутам

Бой у прыватнай забудове на ўскраіне горада прадэманстравалі буйным планам на відэа.

3-я Асобная штурмавая брыгада УСУ паказала адпрацоўку пазіцый войска РФ у прыватнай забудове на ўскраіне Бахмута ў Данецкай вобласці.

Інфармацыя апублікаваная ў афіцыйным Telegram-канале брыгады.

На відэа зафіксаваная праца 1-га штурмавога батальёна 3 АШБ УСУ, пазначана ў паведамленні.

Першыя кадры паказваюць, што байцы прыбылі на пазіцыі ў бронемашынах. Са зброяй напагатове яны выскокваюць вонкі.

Вакол вуліца сярод прыватнай забудовы, якую паспрабавалі захапіць расейскія войскі.

Стралковая зброя ўкраінскіх вайскоўцаў падтрымлівае бронемашыну - на імгненне БМП трапляе ў кадр.

Байцы УСУ перамяшчаюцца па вуліцы, страляючы ў кірунку ворага. Камандзірскі голас раздаецца за кадрам - патрабуе аднаго кулямётчыка на дапамогу.

У пэўны момант чуваць каманда: адзін з байцоў заклікае захапіць агнявы пункт ворага, размешчаны ў доме.

На відэа не паказваюць ва ўсіх падрабязнасцях рэальнай сутычкі. На імгненне гледачы бачаць украінскага вайскоўца, які вядзе бой у двары аднаго з дамоў.

Таксама даносіцца голас аднаго з байцоў: ён кажа, што іх пазіцыю «спалілі».

Сілы абароны пранікаюць унутр дома, магчыма, таго, аб якім гаварылася вышэй. Бачная разбітая мэбля і іншыя сляды бою.

Апошнія кадры - байцы УСУ адпачываюць пасля выканання задання. Выгляд ва ўсіх стомлены, але, здаецца, бой прайшоў паспяхова.

Адзначым, паводле мапы баявых дзеянняў DeepState, якая складаецца на аснове справаздач Генштаба УСУ, войска Расеі змагло прасунуцца на некалькі сотняў метраў у паўднёвых наваколлях Бахмута. Прынамсі, заўважаныя змены лініі фронту ля населенага пункта Іванграда.

Як раней паведамляў сайт Charter97.org, байцы УСУ выбілі «вагнераўцаў» з вуліцы Патрыса Лумумбы ў Бахмуце.