Навукоўцы вызначылі найважнейшы фактар шчаслівага жыцця

Даследаванне пачалося ў 1938 годзе і працягваецца дагэтуль.

Гарвардскі ўніверсітэт пачаў у 1938 годзе беспрэцэдэнтны даследчы праект вывучэння асноў чалавечага дабрабыту. У нядаўна апублікаванай кнізе Роберта Уолдынгера і Марка Шульца The Good Life пададзеныя атрыманыя на гэты момант вынікі і некаторыя нечаканыя высновы.

Было вывучана за 80 гадоў жыццё больш за 2000 чалавек. Высветлілася, што дабрабыт залежыць ад сацыяльна-эканамічнай сітуацыі, грамадскага прызнання, здароўя і стасункаў. І самым важным фактарам аказаліся менавіта добрыя дачыненні, прычым не толькі пары, але і сяброў, сям'і, калег, суседзяў ці выпадкова сустрэтых людзей. Яны робяць нас здаравейшымі і больш шчаслівымі.

Усведамленне гэтага супярэчыць уяўленням аб тым, што для шчаслівага жыцця важны поспех у кар'еры, росквіт, дастатковая колькасць фізічных практыкаванняў або здаровае харчаванне. Усё гэта для дабрабыту немалаважна, але вырашальнае значэнне маюць добрыя стасункі, у якіх людзі падтрымліваюць адзін аднаго, адчуваюць, што іх шануюць, а не эксплуатуюць.

У СМІ шчасце часта разглядаецца як прыз, які можна выйграць дзякуючы дасягненням ці выпадковасці, а затым захаваць назаўжды, пераадолеўшы шматлікія перашкоды. Прытрымліванне гэтых установак можа нават зрабіць нас няшчаснымі, бо ўмацоўваецца адчуванне, што ўсё патрэбнае для добрага жыцця заўсёды недасяжнае.

Здольнасць мець паспяховыя дачыненні можна трэніраваць: напрыклад, сказаць прыемнае слова незнаёмцу на вуліцы, завесці размову з суседам, адправіцца ў падарожжа або зрабіць яшчэ нешта, што надасць ім новы імпульс. У ізаляваных людзей значна больш высокія гармоны стрэсу і горшыя паказчыкі крыві. А тыя, у каго паспяховыя дачыненні, жывуць больш здаровым і доўгім жыццём.

Ніколі не позна ўступаць у добрыя дачыненні, падтрымліваць іх і станавіцца больш шчаслівым. Уяўленне аб тым, што ў сталасці наша развіццё завяршаецца, зняпраўджваецца ўсімі даследаваннямі. Вазьміце тэлефон і напішыце чалавеку, па якім вы сумуеце, кароткае паведамленне. Часта менавіта такія маленькія дзеянні ўплываюць на наша адчуванне шчасця.