«Лейтэнант управы» патэлефанаваў жыхару Берасця, але «падман» не атрымаўся

Размова адразу пайшла не паводле плану ашуканцаў.

Жыхару Берасця 31 студзеня паступіў званок на WhatsApp ад «лейтэнанта ўправы», які папярэдзіў, што на яго прозвішча зламыснік узяў крэдыт. Далей «тэлефонны ашуканец» паспрабаваў выбавіць у суразмоўцы рэквізіты банкаўскіх рахункаў, але размова пайшла не паводле плану. Аўдыёзапіс іх размовы апублікаваў BrestCITY.

Вось што паведаміў берасцеец, які і запісаў размову:

- Учора гадзіне а 5-й вечара справа была. Шкада, з самага пачатку запіс уключыць не паспеў. Прадставіўся таварыш гэты лейтэнантам нейкай управы. Казаў так хутка, што я не запомніў ні прозвішча яго, ні назву ўправы. Пачаў з таго, што нехта праз натарыяльна завераную даверанасць ад майго імя ўзяў крэдыт у банку.

«Лейтэнант» пацікавіўся, ці ёсць у брерасцейца рахункі, крэдыты, у якіх банках. Затым ахвяры павінен быў патэлефанаваць «другі супрацоўнік», каб скасаваць усе неправамерныя дзеянні з рахункам кліента, а фактычна ён паспрабаваў бы выбавіць рэквізіты банкаўскай карты або аформіць крэдыт.

Аднак берасцеец ніякіх звестак тэлефонным ашуканцам не даў і расчараваны «лейтэнант» закончыў размову, папярэдзіўшы суразмоўцу аб адказнасці «за выдаванне звестак папярэдняга трэцім асобам». Больш зламыснікі «пацярпеламу» не тэлефанавалі.