WSJ: У ЗША прапанавалі Украіне ўдарныя дроны за адзін даляр

Беспілотнікі здольныя развіваць хуткасць больш за 400 км/гадзіну.

Гендырэктар амерыканскай кампаніі General Atomics Ліндэн Блу прапануе прадаць украінскаму ўраду два баявыя беспілотнікі Reaper MQ-9 за адзін даляр.

Такую прапанову вытворца зброі робіць, каб «дапамагчы краіне абараніць сябе, паколькі яна рыхтуецца да чаканага расейскага наступу», піша The Wall Street Journal.

Пагадненне запатрабуе ад Кіева выдаткаваць блізу 10 мільёнаў даляраў на падрыхтоўку і дастаўку самалётаў ва Украіну, а таксама яшчэ каля 8 мільёнаў штогод на тэхнічнае абслугоўванне і падтрымку старых мадэляў беспілотнікаў.

Белы дом, які павінен быў бы ўхваліць продаж, адмовіўся ад каментароў. Украінскі ўрад таксама не стаў каментаваць прапанову.

The Wall Street Journal нагадвае, што за апошні год ЗША далі Украіне больш за 700 меншых беспілотнікаў, у тым ліку тактычныя дроны Switchblade.

«Яны шырока выкарыстоўваюцца для абароны ўкраінскіх пазіцый», - адзначае выданне.

Беспілотнік Reaper MQ-9

MQ-9 Reaper (у перакладзе з ангельскага — «жнец, жняярка»; намёк на выраз Grim Reaper — «змрочны жнец», гэта значыць смерць) — модульны выведвальна-ўдарны БПЛА, распрацаваны кампаніяй General Atomics Aeronautical Systems (падраздзяленнем карпарацыі General Dynamics) для выкарыстання ў ВПС ЗША, ВМС ЗША і Брытанскіх ВПС.

Першы палёт MQ-9 Reaper адбыўся 2 лютага 2001 года.

Створаны на аснове MQ-1 Predator, таму часам завецца Predator B. Абсталяваны турбавінтавым рухавіком, які дазваляе развіваць хуткасць больш 400 км/гадзіна. Практычная столь складае 13 000 м. Максімальная працягласць палёту БПЛА MQ-9 Reaper 24 гадзіны.