Захaд над балотам прамысловасці

Сітуацыя ў эканоміцы бачная абсалютна кожнаму беларусу, які ходзіць у краму.

Пакуль адны эканамісты падводзяць вынікі аб рабоце прадпрыемстваў Беларусі ў 2022 годзе, а іншыя ўжо зараз робяць прагнозы росту эканомікі на цэлых 3,8 адсотка, заводы набліжаюцца да самага дна пазыковай ямы. Зразумела, чаканні на 2023 год не абнадзейваюць, а кіраўнікі прадпрыемстваў ужо ўключылі на паўтор заезджаную на працягу ўсяго перыяду Лукашэнкі фразу «зацягнем тужэй за паясы».

Сітуацыя адлюстроўваецца не толькі ў звядзенні дэбету з крэдытам, але таксама і ў чарговым падмане працоўных. Да канца года на многіх прадпрыемствах было вырашана выдаць дастаткова нядрэнныя па мерках нашай краіны прэміі. Цэлых 400 рублёў да Новага Года. Натуральна, працоўных, якім ледзь атрымліваецца зводзіць канцы з канцамі, гэтая навіна ўзрадавала, праўда, даслоўна на хвіліну. Разам з гэтым выйшаў і іншы загад, які скасаваў папярэдняе павышэнне тарыфу. Фактычна правялі махінацыі: забралі частку заробку і нібыта выплацілі прэміі

Дзякуючы санкцыям у Беларусі разбураны шэраг эканамічных сувязей і разбалансаваны рынак. Тую прадукцыю, якая раней ішла на экспарт ва Украіну і Еўропу, цяжка прапанаваць краінам, якія, у прынцыпе, у ёй не зацікаўленыя. Таму часта можна назіраць перыядычныя застоі прадукцыі практычна на кожным прадпрыемстве, якое працуе на ўсялякі экспарт. У сувязі з такім эканамічным становішчам лукашысты плануюць нарасціць узровень інвестыцый аж да 20% ВУП. Хутчэй за ўсё, гэта азначае новыя вялізныя крэдыты на перапрафіляванне або поўную замену некаторых сегментаў, а гэта прывядзе да яшчэ большай расхістанасці. Фінал можа быць падобным на Быхаўскі кансервавы завод, які лукашысты «заінвеставалі» да смерці.

Як рэжым ні імкнецца хаваць ці прыніжаць лічбы, інфляцыя і рэцэсія ў эканоміцы бачна абсалютна кожнаму беларусу, які ходзіць у краму. Ужо ў верасні было вядома, што ВУП краіны знізіўся на 4,9%, а годам раней на 5,2%. І хоць нібыта лаяльны да рэжыму ЕАБР прагназуе ў фінальных справаздачах «стабільны» спад прыбытку на тым жа ўзроўні 5,2%, дзякуючы ўраджайнасці, лічбы на вытворчасцях у студзені і лютым пакажуць абсалютна іншую сітуацыю. З-за мяжы коштаў на нафту знізіцца кошт нафтапрадуктаў і некаторыя цэхі ААТ «Гродна Азот» будзе прасцей закрыць, чым працаваць на страту. А ўгнаенні ў зімовы перыяд не патрэбныя нават на беларускіх палях. «Беларуськалій», які ляжыць на лапатках, таксама наўрад ці дасць якія-небудзь надзеі для рэжыму. Ну, і нафтаперапрацоўка, якая з 2021 года практычна поўнасцю працуе на ўнутраны рынак.

Арцём Чэрнікаў, спецыяльна для Telegram-канала «Баста!»