Беларусы здалі аўто на рамонт у СТА, а іх прадалі па запчастках

Гэта адбылося ў Берасцейскім раёне.

Некалькі жыхароў Берасцейскага раёна напісалі ў міліцыю аднолькавыя заявы. Усе яны аддалі свае аўтамабілі для рамонту і абслугоўвання на адну СТА, унеслі папярэднюю аплату, аднак іх аўто ніхто не займаўся і грошы не вяртаў.

«38-гадовы дырэктар прадпрыемства браў аванс і пераставаў адказваць на званкі, усяляк хаваючыся ад кліентаў, — паведамілі ва УУС рэгіёну. - На атрыманыя грошы рабіў стаўкі ў букмекерскіх канторах. У некаторых выпадках кіраўнік станцыі і зусім прадаваў чужыя аўто па запчастках».

Цяпер вядома пра пецярых пацярпелых, якія перадалі мужчыну больш за пяць тысяч рублёў. Ёсць падставы меркаваць, што пацярпелых можа быць больш. Распачатая крымінальная справа за махлярства.