Уначы ў Расеі падпалілі ваенкамат і прыёмную партыі «Адзіная Расея»
10- 24.09.2022, 18:27
- 9,474
У акно ваенкамата кінулі «кактэйль Молатава».
У ноч на суботу 24 верасня ў расейскім горадзе Канску ў Краснаярскім краі загарэўся ваенкамат, паведамляе расейская служба «Бі-бі-сі».
Прыкладна ў гадзіну ночы невядомы мужчына кінуў у акно першага паверха «кактэйль Молатава». Пажарныя, якія прыехалі на месца, патушылі ўзгаранне, будынак не пацярпеў. Але ў пакоі выгарала мэбля. Паводле інфармацыі «7 канала Краснаярск» ваенкамат спрабаваў падпаліць пажылы мужчына.
У горадзе Салават каля дзвярэй грамадскай прыёмнай «Адзінай Расеі» хтосьці падпаліў аўтамабільныя пакрышкі. Пажар патушылі, але ў выніку ўзгарання пацярпелі пластыкавыя ўваходныя дзверы.
Новая хваля падпалаў ваенкаматаў пачалася ў Расеі 21 верасня, калі Пуцін абвясціў аб мабілізацыі. За тры дні вядома аб спробах падпалаў ваенкаматаў як мінімум у шасці расейскіх рэгіёнах. Яшчэ ў некалькіх выпадках людзі спрабавалі падпаліць будынкі гарадскіх адміністрацый.