Пуцін з’язджае з глузду і блефуе

Кіраўнік Крамля разыгрывае апошнюю карту.

У нядаўнім звароце да расейскага народа прэзідэнт РФ Уладзімір Пуцін чарговым разам заявіў аб тым, што «ў выпадку пагрозы нацыянальнай бяспецы» можа ўжыць тактычную ядзерную зброю.

Аднак на Захадзе большасць экспэртаў схіляюцца да меркавання, што кіраўнік Крамля блефуе і разыгрывае «ядзерную карту» праз тупік, у якім апынуўся. Менавіта так мяркуе старэйшы навуковы супрацоўнік Еўразійскага цэнтра Atlantic Council Браян Уітмар, які даў каментар НВ.

На думку экспэрта, Украіне і сусветнай супольнасці варта арыентавацца на звесткі амерыканскай выведкі, якая рэгулярна дае неабходную інфармацыю аб перамяшчэнні расейскіх узбраенняў і патэнцыйных пагрозах іх выкарыстання. Уітмар упэўнены, што ЗША зробяць усё неабходнае для ранняга папярэджання хаўруснікаў аб намерах Пуціна.

Вайсковы экспэрт зазначыў, што на гэтым этапе вайны не бачыць рэальнай пагрозы выкарыстання ядзернай зброі з боку Расеі.

«Пуцін шалее, і цяпер ён блефуе, разыгрываючы ядзерную карту. Гэта ўжо старая і заезджаная кружэлка. ЗША не павінны адыходзіць. Нічога не змянілася з пункту гледжання падыходу да Украіны. Сённяшняя сітуацыя - нягледзячы на ляск пуцінскай шаблі - нічым не адрозніваецца ад учорашняй», - сказаў Уітмар.

На думку супрацоўніка Atlantic Council, ЗША павінны і надалей прытрымлівацца палітыкі санкцыянаванага раскрыцця звестак для таго, каб свет быў праінфармаваны аб магчымых пагрозах. Акрамя таго, Уітмар падкрэсліў, што Белы Дом павінен паслаць Маскве закулісны сігнал з перасцярогай аб выкарыстанні ядзернай зброі. Ён павінен даць Пуціну дакладнае ўсведамленне, што ў выпадку невыканання дамоўленасцей войскі NATO цалкам знішчаць расейскіх жаўнераў ва Украіне.