Нацбанк прызнаўся, што ўключыў друкарскі станок «на ўсе застаўкі»

Стала вядома, колькі «лішніх» грошай з'явілася ў абарачэнні з пачатку года.

У Беларусі значна вырасла агульная сума гатовых грошай, якія знаходзяцца ў абароце. На пачатак верасня гэты паказчык склаў 6 млрд. 16,7 млн. рублёў. Гэта амаль на 1,3 млрд рублёў больш, чым на пачатак года, вынікае са звестак Нацбанка. Раней экспэрты меркавалі, што Нацбанк уключыў друкарскі станок, піша zerkalo.io.

Гатовыя грошы ў абароце за жнівень выраслі на 8 млн рублёў - да 6 млрд 16,7 млн рублёў. Для параўнання: за ліпень прырост склаў 170,9 млн рублёў. На 1 студзеня гэтага года гатовыя грошы ў абароце былі на ўзроўні 4 млрд. 720,4 млн. рублёў. Гэта значыць, у параўнанні з пачаткам года гэты паказчык вырас амаль на 1,3 млрд рублёў.

За жнівень прыкметна таксама вырасла шырокая грашовая маса, якая ўключае сродкі людзей і прадпрыемстваў на рахунках у банках, а таксама гатовыя грошы ў абарачэнні. На 1 верасня гэты паказчык перавысіў 54,2 млрд рублёў. Гэтая сума амаль на 392 млн рублёў большая, чым месяцам раней.

У Нацбанку раней заяўлялі, што праводзілі ў першым квартале валютныя інтэрвенцыі ў эканоміку, прасцей кажучы, рэгулятар «уліваў» грошы. Гэта адбывалася на фоне падвышанага попыту на валюту з боку суб'ектаў гаспадарання і банкаў.

Раней чыноўнікі дапускалі, што ў 2022 годзе ў Беларусі могуць спатрэбіцца валютныя інтэрвенцыі, каб пазбегнуць рэзкага скачка курса рубля. Грашовыя «ўліванні» ў эканоміку таксама могуць зрабіць для папаўнення золатавалютных рэзерваў, якія праз выплаты крэдытаў будуць раставаць. Гэта прадугледжана грашова-крэдытнай палітыкай на гэты год.

За жнівень гэтага года золатавалютныя рэзервы знізіліся на 97,6 млн. даляраў.