Беларускі распрацоўшчык гульняў звольніў супрацоўнікаў у Беларусі

Таксама звольненыя супрацоўнікі ў Расеі і рэлаканты ў Літве.

Супрацоўнікі мабільнага распрацоўшчыка з беларускімі каранямі Belka Games паведамілі, што кампанія скараціла людзей у менскім і расейскім падраздзяленнях. Кажуць, пад звальненне патрапілі і рэлаканты. Кампанія звольніла сямейную пару, якая вясной пераехала з Менска ў Вільню. Devby.io даведаўся падрабязнасці.

Што гавораць супрацоўнікі

Кампанія ў распрацоўцы гульняў пастанавіла скарачаць штат пасля пачатку ваенных дзеянняў ва Украіне - гэта было звязана са складанасцямі ў працы ў Беларусі і Расеі. Таксама на пастанову паўплывалі фінансавыя прычыны.

Як распавёў адзін са звольненых супрацоўнікаў, у кампаніі вялікі штат, але прыбытак не расце: «Цяпер увесь мабільны геймдэў падае. У свеце крызіс, інфляцыя прымушае людзей эканоміць на забавах».

Паводле ягонай інфармацыі, у жніўні аднамомантава было звольнена больш за 50 чалавек, якія працавалі ў Беларусі і Расеі.

«Фінансавы запас ёсць на 2 месяцы»

Яшчэ адзін былы супрацоўнік Belka Games расказаў, што некалькі чалавек былі звольненыя з літоўскага офіса. Без працы засталіся ён і ягоная жонка, якая таксама працавала ў кампаніі:

- У пачатку вясны паведамілі аб складанасцях для тых, хто працуе ў беларускім офісе. Пасля 24 лютага праз новыя санкцыі ніхто не мог гарантаваць, што з працай у Беларусі і Расеі ўсё будзе добра. Папярэдзілі, калі будуць скарачэнні, то найперш яны закрануць беларускія і расейскія падраздзяленні. Таму супрацоўнікам прапаноўвалі рэлакейт.

Мы пагадзіліся і рэлакаваліся ў Вільню, каб працаваць у літоўскім офісе Belka Games. Пераехалі ўсёй сям'ёй (з дзвюма дочкамі, сабакам і катом) на сваім аўто. Кампанія ў сувязі з рэлакейтам індэксавала заробак. Плюс нам кампенсавалі выдаткі на візы, страхоўкі, у тым ліку на аўто, на тэсты на ковід і частку выдаткаў на арэнду кватэры.

У Літву мы пераехалі на пачатку красавіка. А 5 ліпеня мяне і жонку апавясцілі аб звальненні.

Мы апынуліся ў няпростай сітуацыі. У нас ёсць BlueCard як у высокакваліфікаваных спецыялістаў. Але на працягу шасці месяцаў нам трэба знайсці новую працу ў літоўскай кампаніі, у адваротным выпадку дНЖ анулююць. У прынцыпе, дастаткова каб адзін з сямейнікаў знайшоў працу ў літоўскай фірме, тады другі можа памяняць ВНЖ, каб яно было проста як для сямейніка, і адкрыць ІП.

Пакуль ёсць фінансавы запас на пару месяцаў. Будзем думаць і круціцца, іншага выйсця няма. Нам трэба аплачваць арэнду жылля ў Вільні (блізу 600 еўра). Акрамя таго, яшчэ ў Беларусі мы ўзялі крэдыт на набыццё кватэры на другасным рынку. Выплачваць яго яшчэ больш за 5 гадоў. Старэйшая дачка пайшла ў першы клас у Вільні, малодшая ходзіць у дзіцячы садок. Так што ў найбліжэйшы навучальны год не плануем пераезд. Але будзем вывучаць варыянт з Польшчай.

Як піша dev.by, у беларускім офісе Belka Games яшчэ летась працавала больш за 100 чалавек. Дакладная колькасць супрацоўнікаў цяпер невядомая. Цяпер у кампаніі ёсць офісы ў ЗША, Украіне, Грузіі, Польшчы, Літве і на Кіпры. Беларусь у пераліку лакацый адсутнічае.

Па выніках мінулага года Belka Games увайшла ў топ-3 паводле сумы атрыманага даходу сярод паблішэраў з беларускімі каранямі (2-е месца). Кампанія атрымала 130,7 мільёна даляраў. У параўнанні з 2020 годам даход вырас на 44,5 працэнта. Belka Games увайшла ў топ-100 мабільных паблішэраў свету паводле версіі App Annie, у топ-20 паводле даходу ў рэгіёне ЕМЕА.

З апошніх звестках аналітычнай платформы Sensor Tower, у жніўні гэтага года даход Belka Games склаў 7 мільёнаў даляраў. Для параўнання, за жнівень мінулага года кампанія атрымала даход сумай 11 мільёнаў даляраў.