Надта дрэнныя навіны для РФ
14- Барыслаў Бяроза
- 25.08.2022, 14:38
- 28,168
Што азначае заява Пентагона аб вайсковай дапамозе Украіне.
Я з кепскімі навінамі. З надта кепскімі навінамі для Расеі.
Пентагон 24 жніўня агучыў, што новы пакет дапамогі Украіне прызначаны для ўмацавання абароны дзяржавы на доўгія гады, у адрозненне ад больш кароткатэрміновай вайсковай дапамогі.
Фактычна заява Пентагона азначае:
а) Пентагон упэўнены, што Украіна як міжнародны суб'ект захаваецца;
б) Украіна разглядаецца, як стратэгічны хаўруснік калектыўнага Захаду і яму будуць дапамагаць на сталай аснове;
в) вайсковая стратэгія Украіны - актыўнае стрымліванне Расеі і абнуленне яе вайсковага патэнцыялу.
Гэта вельмі кепскія навіны для Расеі. Уварванне ва Украіну павольна, але ўпэўнена ператвараецца для Расеі ў такое ж «балота», якім В'етнам у выніку стаў для ЗША.
Пры абсалютна розных прычынах пачатку войнаў гэтыя сітуацыі падобныя. Але нагадаю, што ў выніку ЗША выдаткавалі вялізны вайсковы, фінансавы і чалавечы рэсурс, але нічога не дабіліся і вымушаныя былі пакінуць В'етнам.
Гэтай вайной ЗША не ганарыцца. Расею чакае тое ж, але памножанае на разбуральныя працэсы накладання санкцый і эфект ізаляцыі ад сучасных тэхналогій.
Фактычна, Крэмль заганяе Расею ў рамкі Ірана. Жыць так можна, але паўнавартасна развівацца і адыгрываць актыўную ролю ў геапалітыцы не ўдасца. Расея вымушаная будзе вывесці войскі з Украіны, але наступствы для яе будуць невымерна горшыя, чым былі наступствы вываду войскаў з В'етнама для ЗША.
А галоўнае, што ўжо прадэманстравала Расея, што яна з яе ўзроўнем узбраення і з яе войскам не з'яўляецца роўным спаборнікам для ЗША і для NATO. Міф развеяўся ва Украіне.
Барыслаў Бяроза, «Фэйсбук»