На «Гродна-Азот» Лукашэнка падпісаў сабе прысуд

Сітуацыя на прадпрыемстве адлюстроўвае калапс усёй сістэмы.

На прадпрыемстве ААТ «Гродна Азот» цэхі рэгулярна не вяртаюцца з планавага рамонту. Апошнім прыкладам стаў зусім новы цэх вытворчасці азотнай кіслаты і вадкіх азотных угнаенняў, уведзены ў эксплуатацыю 28 лютага 2019 года. Праект коштам 220 млн рублёў быў надзеяй для выхаду з крызісу прадпрыемства. Новыя працоўныя месцы, сучаснае абсталяванне, зніжэнне сабекошту павінны былі вывесці прадпрыемства на сусветны рынак і павысіць канкурэнтаздольнасць, а нагрузка павінна была павялічыць выпуск таварнай прадукцыі – карбамідна-аміячнай сумесі (КАС) – да 1,2 млн т на год.

Але надзеям лукашыстаў не наканавана спраўдзіцца пры цяперашнім рэжыме. Ільвіная дзель беларускага КАС экспартавалася ў Цэнтральную і Заходнюю Еўропу. Але пасля ўвядзення маштабных санкцый супраць дыктатарскага рэжыму кіраўніцтва прадпрыемства вымушанае было спачатку рэкордна знізіць адгрузку, а цяпер і зусім спыніць яе.

Яшчэ да пачатку планавага рамонту, які пачаўся 4 жніўня, працоўныя заўважылі, што цягнікі з цыстэрнамі не пакідаюць завод. Высветлілася, што для імітацыі выпрацоўкі кіраўніцтва прадпрыемства ўжыла захады проста запаўняць цыстэрны, каб вызваляць рэзервуары з гатовай прадукцыяй. Былі сітуацыі, калі чыгуначныя шляхі былі забітыя настолькі, што не дазвалялі прыбыць пустым цыстэрнам для запаўнення.

На сёння вядома, што з планавага рамонту збіраюцца пакуль што вяртаць толькі стары цэх. Звязана гэта з эканоміяй у сувязі з вельмі нізкай нагрузкай. Абслугоўны зменны персанал скарацілі да мінімуму, а рэшта незадзейнічаных у працоўным працэсе супрацоўнікаў змушаная хадзіць у пяцідзёнку, займаючыся дапаможнымі працамі.

Не менш сумная сітуацыя адбываецца з іншымі раней прыбытковымі цэхамі на прадпрыемстве. Працоўныя цэхаў вытворчасці карбаміду і сульфату амонію паведамляюць, што склады заваленыя больш як на 60 адсоткаў. Але кіраўніцтва прадаўжае імітацыю нармальнай працы прадпрыемства, закопваючы сябе ў пазыковай яме.

З крызісам, у які ўвайшло прадпрыемства, новыя праекты больш не ў трэндзе. Хоць яшчэ ў 2018 годзе была створаная міжустановавая працоўная група для рэалізацыі інвестпраекта «Будаўніцтва азотнага комплексу». Мары запусціць новую вытворчасць у 2024 годзе так і засталіся на паперы, а тэрміны пераносяцца ўсё далей.

Вінаваціць лукашыстам больш нікога не застаецца, акрамя сябе і дыктатара. Нарваўшыся на каласальныя санкцыі, Лукашэнка падпісаў прысуд не толькі сабе, але і сваім прыкарытнікам. Цяпер прадпрыемствы Беларусі вымушаныя імітаваць працу, але на страту сабе. Набываць энэргарэсурсы і сыравіну, не маючы пры гэтым экспарту – роўна поўнаму калапсу першапачаткова гнілой сістэмы.

Арцём Чэрнікаў, спецыяльна для Telegram-канала «Баста!»