У Жодзіне дзясяткі арэндных кватэр засталіся без уласнікаў

Усе яны ў занядбаным стане.

Жодзінец Дзяніс чытаў свае «ўлюбёныя» «Жодзінскія навіны» і зноў уразіўся матэрыялам аб тым, як «старшыня» гарвыканкама Дзмітрый Заблоцкі выступіў перад работнікамі, піша ex-press.by. На гэты раз - жодзінскага водаканала:

- Судзячы з усяго, гэта было не так, як з працаўнікамі ЖКГ. Тут больш выразная публікацыя, але не менш дзіўныя ўражанні ад яе.

Асноўнай тэмай адзінага дня інфармавання насельніцтва стала жыллё. Але ж нават мне, шараговаму чытачу, старшыня не паведаміў нічога новага, усе перспектывы ўжо не аднойчы прамаўляліся з трыбун, пра іх пісалі СМІ.

У дзявятым мікрараёне СУ-161 актыўнымі тэмпамі сёння ўзводзіць два дамы: адзін для шматдзетных сем'яў, другі — для дольнікаў. Тут жа закладваюцца яшчэ два дамы, якія пачнуць расці налета. У планах яшчэ адзін - у мікрараёне Навуковым. У перспектыве - забудова новага, пятага мікрараёна, які ў будучыні вырасце за РЭМІЗАм.

Але распавядаючы пра жыллё працаўнікам водаканала, Заблоцкі паведаміў цікавае: у горадзе 20 арэндных кватэр засталіся без наймальнікаў, але тут жа патлумачыў:

- Часцей за ўсё такое жыллё знаходзіцца ў запушчаным стане. Паводле закона, такія кватэры павінны быць прыведзеныя ў парадак перад перадачай у арэнду карыстальнікам. А гэты час і немалыя грошы. Цяпер з'явілася магчымасць выдзяляць жыллё ахвотным без рамонту - сродкі, якія людзі ўкладуць ва ўладкаванне, будуць залічвацца ў арэндную плату.

- Сур'ёзна? А што здарылася? Куды ад выдатных умоў арэнды падзеліся гэтыя людзі? І, дарэчы, дзе на сайце выканкама інфармацыя аб арэндных кватэрах? Толькі пра адну кватэру за 274,62 на месяц для работнікаў БелАЗа ўдалося знайсці. Больш звестак няма. Дзе вы іх хаваеце?

А яшчэ Дзмітрый Заблоцкі расказаў, што ў дзявятым мікрараёне БелАЗ пабудуе новы фізкультурна-аздараўленчы цэнтр з басэйнам. Недарэмнае ж абяцанне? Магчыма, адказалі на фотафакт, дзе дзясяткі, а то і сотні людзей стаяць у чарзе па некалькі гадзін, каб атрымаць права наведваць за свае грошы басэйн?

Закрануў Заблоцкі і добраўпарадкаванне пляжа, «дзе ўстаноўленыя новыя драўляныя домікі, арганізоўваецца пляцоўка і найбліжэйшым часам пачнецца мантаж трэнажораў»:

- Да канца пляжнага сезону, да навучальнага года трэнажоры ці што? Ну, «крэпкія гаспадарнікі», у сваім стылі паступаюць, не думаючы, што будзе з трэнажорамі ў пустэльным месцы ўвосень, узімку і ўвесну побач з ракой. Ну а што ім - абы паабяцаць і зрабіць фоткі ў газету, а потым хай усё руйнуецца.