28 сакавiка 2024, Чацвер, 12:43
Падтрымайце
сайт
Сім сім,
Хартыя 97!
Рубрыкі

Навукоўцы: Людзі навучыліся гаварыць, калі страцілі частку галасавога апарату прыматаў

6
Навукоўцы: Людзі навучыліся гаварыць, калі страцілі частку галасавога апарату прыматаў

Часта правільная эвалюцыя - гэта эвалюцыя ад складанага да простага, а не наадварот.

Новае даследаванне галасавога апарата чалавека ды іншых прыматаў паказвае, што наша гартань падчас эвалюцыі здабыла значна прасцейшую анатомію, чым у нашых негаваркіх продкаў, паведамляе Science. Гэта спрашчэнне акурат і дазволіла нашаму гатунку замест складаных пошчакаў, як у іншых прыматаў, прайграваць роўную паслядоўнасць гукаў, якія сталі маўленнем.

"Гэта справядлівыя высновы", – кажа Барт дэ Бур, лінгвіст, які вывучае эвалюцыю маўлення ў Вольным універсітэце Брусэля.

У людзей за генерацыю гукаў адказвае падвойная пара зморшчын у гартані, вядомых як галасавыя звязкі. А галасавы апарат іншых прыматаў мае плюс да іх яшчэ і тонкія лапікі, вядомыя як галасавыя мэмбраны, або галасавыя губы, якія часта знаходзяцца поруч з галасавымі звязкамі або злучаныя з імі.

Біёлаг-эвалюцыяніст з Венскага ўніверсітэта, які вывучае галасавы апарат прыматаў, Уільям Тэкумсэ Фітч і ягоныя калегі пабудавалі кампутарную мадэль гартані малпы. Галасавыя мэмбраны віртуальнай гартані хаатычна вагаліся і спараджалі нераўнамерны акустычны струмень. Як толькі даследнікі прыбралі "лішнія" перагародкі ў гартані, галасавыя звязкі сталі падобнымі да чалавечых, і гукі, якія яны спараджалі, таксама сталі нагадваць чалавечыя.

Лішнія галасавыя мэмбраны "прымушаюць вас гучаць як Курт Кабэйн, а не як оперны спявак", - жартуе Фітч.

"Шмат хто схільны думаць, што эвалюцыя – гэта заўсёды ўскладненне, але вось вам добры контрпрыклад", – падкрэслівае навуковец.

Напісаць каментар 6

Таксама сачыце за акаўнтамі Charter97.org у сацыяльных сетках