«Людзі тут больш шчаслівыя, спакойныя і расслабленыя»

Случчанка расказала, чым жыццё ў Гішпаніі адрозніваецца ад жыцця ў Беларусі.

Случчанка Анастасія Грыненка жыве ў Гішпаніі. Яна расказала праекту Lampa, чым жыццё ў Гішпаніі адрозніваецца ад жыцця ў Беларусі.

«Пачну з таго, што геаграфія Рэспублікі Беларусь і Каралеўства Гішпанія істотна адрозніваюцца. Адпаведна і адрозненні ў культуры, менталітэце і проста надвор'і - істотныя.

1. Першае і самае галоўнае адрозненне, асабіста для мяне, гэта тое, што Гішпанія з'яўляецца Каралеўствам. Ім удалося захаваць тое, з чаго ўсё пачыналася - Гісторыю Роду.

2. Надвор'е вызначае ўсё! Вітамін Д тут круглы год - таму людзі, якія жывуць у Гішпаніі, больш шчаслівыя, спакойныя і расслабленыя. Ну і мора вядома! Калі сумна - іду да вады.

3. Свежыя морапрадукты і садавіна/агародніна тут круглы год. А вось з малочнай прадукцыяй праблема асабіста для мяне. Я люблю наш беларускі кефір і тварог, а яго тут не знайсці. Замену не знайшла. А так хочацца сырнікаў!

4. Кватэрная злачыннасць. Асабіста мы сутыкнуліся з такім у 2019 годзе і амаль страцілі 7500 еўраў. Афармлялі ў арэнду новую кватэру праз рыэлтара. Заплацілі ўнёсак за 6 месяцаў, а потым выявілася, што гаспадар кватэры, зусім не гаспадар, а «окупас» і заплацілі не толькі мы, але і яшчэ дзве пары. Паколькі мы афармлялі кватэру праз рыэлтара, нам далі іншую кватэру і грошы мы не страцілі, а вось нерваў змарнавалі тону!

І самы прыкол, які мяне раз'юшвае, што ва ўсякі час, калі мы адсутнічаем дома доўга — сюды можа нехта залезці, памяняць ключы і сказаць, што ён тут жыве. Калі падаць у суд - выдаткуеце велізарныя грошы, але гэтыя людзі ўсё адно маюць права жыць у вашай кватэры да 5 гадоў уключна. У Беларусі такога няма! Мы нават на ноч дзверы не зачыняем.

5. Кошты «камуналкі». Асабліва электрычнасці. Напрыклад: мы не былі ў Гішпаніі роўна месяц і тыдзень - аплата за святло прыйшла ў суме 75€. Калі мы карыстаемся кандыцыянерам, выходзіць амаль 250-300€ на месяц. Для мяне гэта шок, хаця ўжо прывыкаю да такіх аплат. Чую матчын голас у галаве «Выключайце святло - нагарыць, самі плаціць будзеце». Дык вось - гэта страшылка не для беларусаў, а для гішпанцаў».