Кіраўнік МЗС Японіі ў рамках сустрэчы G20 адмовіўся ад удзелу ў вячэры разам з Лаўровым

Яшчэ шэраг кіраўнікоў МЗС не жадаюць сустракацца з кіраўніком МЗС РФ.

Міністр замежных спраў Японіі Эсімас Хаясі адмовіўся ад удзелу ў афіцыйнай вячэры кіраўнікоў МЗС краін G20 праз імавернасць прысутнасці на сустрэчы міністра замежных спраў РФ Сяргея Лаўрова. Пра гэта паведамляе японскае агенцтва Kyodo News.

"У сувязі з тым, што там мог прысутнічаць кіраўнік МЗС РФ Сяргей Лаўроў, была прынятая пастанова, што прысутнасць кіраўніка (МЗС Японіі, – рэд.) будзе недарэчнай", – гаворыцца ў публікацыі.

Раней паведамлялася, што міністр замежных спраў краіны-агрэсаркі Сяргей Лаўроў прыляцеў у Інданезію на сустрэчу міністраў замежных спраў G20.

Аднак шэраг кіраўнікоў МЗС, уключаючы міністра замежных спраў Нямеччыны Аналену Бербок і дзяржсакратара ЗША Энтані Блінкена, выключылі магчымасць камунікацыі з Лаўровым.

Бербок заявіла, што Расеі нельга дазваляць выкарыстоўваць сустрэчу G20 у якасці платформы, улічваючы яе агрэсію ва Украіне.

Тым не менш, у G20 уваходзяць таксама Кітай, Інданезія, Індыя і Паўднёвая Афрыка, якія не выказваюць асуджэння расейскай агрэсіі супраць Украіны і працягваюць актыўнае супрацоўніцтва з агрэсарам, які топча ўсе міжнародныя нормы.