У Літве заявілі, што не пагодзяцца на зялёны калідор для транзіту ў Калінінград
13- 7.07.2022, 17:13
- 7,894
Дарадца прэзідэнта краіны заявіла, што гэта пытанне еўрапейскага рэгулявання.
Дарадца прэзідэнта Літвы Аста Скайсгірытэ заявіла, што ўлады рэспублікі не пагодзяцца на ўсталяванне зялёных калідораў для транзіту грузаў у Калінінградскую вобласць праз сваю тэрыторыю. Пра гэта паведамляе радыё LRT.
Са слоў Скайсгірытэ, неабходная не толькі забарона транзіту грузаў з санкцыйнага спісу, але і кантроль. «Таму, калі ў публічнай прасторы нехта гаворыць пра зялёныя калідоры, мы падкрэсліваем: не можа быць і думкі аб тым, каб Літва не кантралявала, што адбываецца на яе тэрыторыі», — сказала яна.
Скайсгірыце таксама падкрэсліла, што Літва не рабіла няўзгодненых дзеянняў аб калінінградскім транзіце. «Літва выконвае еўрапейскія санкцыі, гэта пытанне еўрапейскага рэгулявання. Гэтая справа не Літвы і Калінінграда, а ЕЗ і Расеі», - заявіла яна.
Раней губернатар Калінінградскай вобласці Антон Аліханаў прапанаваў пабудаваць выдзеленыя чыгунку і аўтамабільную дарогі, якая злучае асноўную тэрыторыю РФ і Калінінград. Ён адзначыў, што тэхнічна рэалізаваць такі праект можна толькі пры згодзе Літвы.