СМІ: Расейская контрвыведка затрымала вайсковага камісара Крыма

Трое ягоных падначаленых знаходзяцца пад следствам.

Вайсковая контрвыведка Паўднёвай вайсковай акругі Расеі прыйшла з ператрусам да вайсковага камісара Крыма Юрыя Лымара, паведамляе «Новая газета».

Як распавяла крыніца тэлеканала, Лымар падазраецца паводле артыкулаў аб злоўжыванні службовымі паўнамоцтвамі (285 КК) і атрыманні хабару (арт.290 КК). «Аддаваў указанні падпарадкаваным на ўчыненне незаконных дзеянняў у дачыненні да грамадзян прызыўнога ўзросту», - дадаў субяседнік.

«Ідзе ператрус у вайсковага камісара Крыма, працуе вайсковая контрвыведка», - сказаў суразмоўца «Інтэрфакса». У якім статусе знаходзіцца Лымар, не ўдакладняецца.

Паводле інфармацыі агенцтва, трое падпарадкаваных вайсковага камісара ўжо знаходзяцца пад следствам - вайсковы камісар Джанкоя, начальнікі аддзелаў прызыву Белагорскага і Сімферопальскага камісарыятаў, супраць іх распачатыя крымінальныя справы паводле артыкулаў 290 і 291 КК (дача хабару).

Вайсковым камісарам Рэспублікі Крым Юрый Лымар стаў у жніўні 2020 года. Да прызначэння на пасаду вайсковага камісара РК ён праходзіў вайсковую службу на пасадзе вайсковага камісара ў Астраханскай вобласці.