«Можа, яны ўжо хутка і ў лазні грамадскія прыйдуць?»

Жыхары Жодзіна і Барысава абураныя рэйдамі лукашыстаў на гарадскіх пляжах.

У апошні час надта часта на гарадскіх пляжах можна бачыць супрацоўнікаў міліцыі, пішуць EX-PRESS.BY жыхары Жодзіна і Барысава. На іхнюю думку, гэта не дазваляе людзям расслабіцца і паўнавартасна атрымаць асалоду ад заслужанага адпачынку. «А што вы думаеце з нагоды прысутнасці міліцыі на пляжах?» – спыталі журналісты чытачоў.

Фёдар, Жодзіна:

– Некалькі гадоў таму на пляжы ў Жодзіне забілі хлопца. Ён быў разам са сваёй сям'ёй, з бацькамі і братамі-сёстрамі. Гэта было вельмі страшна, і ніякай міліцыі ў гэты час на пляжы не было. Калі б міліцыя была, дык гэтага, магчыма, не адбылося б. Але я ўсё роўна за тое, каб супрацоўнікі ведалі правілы прыстойнасці, не хадзілі паміж лежакамі і не прыставалі ад няма чаго рабіць да ўсіх, да каго захочуць.

Ягор, Барысаў:

– Не разумею ўвогуле, чаму міліцыя павінна вартаваць менавіта на пляжы. Там жа ў асноўным безабаронныя людзі, усё навідавоку. Я на пляжы амаль усё лета ў сонечныя дні, і калі з'яўляецца нарад, мне непрыемна. У іх жа яшчэ і відэарэгістратары на форму прымацаваныя, і што менавіта яны імі здымаюць – вось пытанне. А самае агіднае, калі яны нейкую акцыю праводзяць, улёткі раздаюць ці віктарыну для дзяцей. Народ не можа іх паслаць куды падалей. На пляжы ёсць ратавальнікі, якія ў выпадку чаго выклічуць нарад адным націскам кнопкі.

Таццяна, Жодзіна:

– На жодзінскай «Брызгалаўцы» цяпер, кажуць, і відэаназіранне ёсць. Цікава, у кабінках для пераапранання таксама? Мне ўсё гэта – назіранне і сілавікі, – жудасна не падабаецца. Я аддаю перавагу іншым пляжам, далёкім ад горада месцам.

Ксенія, Жодзіна:

– На пляжы нічога няма: добраўпарадкавання няма, лежакоў няма, кавярняў практычна няма, вада брудная. Але затое міліцыя. Я шмат падарожнічала, бывала на розных пляжах і не памятаю нарадаў паліцыі паміж лежакамі. Можа, яны ўжо хутка і ў лазні грамадскія прыйдуць? Там яшчэ цікавей паздымаць і ўразіцца.

Аляксандр, Барысаў:

– Калі б мы верылі сваёй міліцыі, калі б паважалі іх, то ніхто не быў бы супраць яе прысутнасці дзе заўгодна. Але глядзіш на чалавека ў міліцэйскай форме і думаеш – ён біў людзей у 2020-м? Ён урываўся ў кватэры людзей, краў там кампутары і тэлефоны? Цягнуў нявінных людзей у турму? У нас вельмі доўга будзе непрыманне да «праваахоўных» органаў – і не важна, дзе ты гэтую міліцыю сустрэнеш.