Робэрт Тышкевіч: Ідзе знішчэнне польскай нацыянальнай памяці ў Беларусі

На Гарадзеншчыне руйнуюць пахаванні польскіх жаўнераў Арміі Краёвай.

Акты вандалізму на дзяржаўным узроўні. На Гарадзеншчыне руйнуюць пахаванні польскіх жаўнераў Арміі Краёвай. Толькі нядаўна польскае МЗС паведаміла, што невядомыя знішчылі польскія пахаванні ў Ашмянах, Іўі, Ёдкавічах, Багданах, Бабровічах, Дындылішках, а цяпер у сацыяльных сетках з’явіліся фотаздымкі зруйнаваных пахаванняў польскіх жаўнераў у Мікулішках, пiша racyja.com.

Дэпутат польскага Сейму Робэрт Тышкевіч, старшыня камісіі па сувязях з палякамі за мяжой, называе гэта нечуваным актам варварства:

– Такога яшчэ не бачыла цывілізаваная Еўропа. Бывае часамі, што скідаюць і руйнуюць помнікі, але ніколі не знішчаюцца магілы. Гэта па-за межамі еўрапейскай цывілізацыі. Прыгадаем, што праз тэрыторыю Еўропы прайшло шмат войнаў, і ёсць розныя могілкі, але стандартам еўрапейскай цывілізацыі ёсць дбанне пра пахаванні жаўнераў незалежна ад таго, з якой арміі яны паходзяць і ў якіх войнах яны загінулі. У гэтым выпадку мы маем дачыненне з парушэннем граніцы элементарнай прыстойнасці і цывілізаваных паводзін.

“Поўная дзікасць і поўнае варварства”, – дадае польскі палітык. І звяртае ўвагу, што гэта чарговы этап пераследу прадстаўнікоў польскай меншасці ў Беларусі:

– На працягу года мы маем дачыненне з антыпольскай кампаніяй у Беларусі: зачыняюцца польскія школы, за кратамі знаходзіцца Анджэй Пачобут, пад хатнім арыштам – Анжаліка Борыс, лідары польскай меншасці ў Беларусі. Таксама забараняюцца любыя культурныя мерапрыемствы, звязаныя з ушанаваннем памяці нацыянальных герояў. І вось чарговым прыкладам, чарговай граніцай, якая была зламаная, стала проста фізічнае знішчэнне слядоў польскай нацыянальнай памяці ў Беларусі.

Паводле польскага Міністэрства замежных спраў, у гарадзенскім рэгіёне знаходзіцца 550 месцаў пахавання польскіх жаўнераў, у тым ліку ўдзельнікаў народных паўстанняў і абаронцаў Гародні.

Гісторык Васіль Герасімчык на сваёй старонцы ў фэйсбуку прыгадвае, што бой пад Мікулішкамі стаў своеасаблівым “баявым хрышчэннем” партызан Арміі Краёвай на Віленшчыне. Атрад акаўцаў быў атакаваны нямецка-літоўскім карным атрадам, у выніку цяжкага бою загінулі ўсе нямецкія жандармы з Ашмянаў і Гальшанаў разам са сваім камандзірам і 20 літоўскіх паліцэйскіх, было забіта пяць партызан АК, сярод якіх паручнік Пётр Матылевіч (псеўданім “Крэмень”).

У канцы чэрвеня 1992 года ў Мікулішках адбылося ўрачыстае адкрыццё помніка загінулым акаўцам. Прысутнічалі госці з Вільні, Польшчы, прадстаўнікі мясцовых беларускіх уладаў і грамадскасці, журналісты, а ксёндз Бенядыкт Высіньскі адслужыў жалобную імшу.