Сіноптык: У ліпені ў Беларусі надыдзе ідэальнае лета

Колькі дажджлівых дзён нас чакае?

Беларускі сіноптык Дзмітры Рабаў паведаміў, што ў ліпені ў Беларусі настане ідэальнае лета.

Паводле слоў сіноптыка, у адпаведнасці са звесткамі сусветных прагнастычных цэнтраў, сярэдняя тэмпература паветра ў ліпені на 1 градус перавысіць шматгадовую норму для гэтага перыяду. Калі параўноўваць з чэрвенем, то яна будзе вышэйшая на 1-2 градусы.

Рабаў удакладніў, што кожны дзень гарачага надвор'я не будзе і перыядычна тэмпература будзе паніжацца.

- Удзень тэмпература ў асноўным складзе ад плюс 22 да плюс 27 градусаў, а ноччу паветра прагрэецца ад 12 да 14 градусаў, - сказаў Рабаў.

Што да ападкаў, то сіноптык звярнуў увагу на тое, што іх чакаецца блізу кліматычнай нормы - ад 12 да 16 дзён з дажджом. І ўдакладніў, што пры цыкланічным характары надвор'я ў некаторыя гады колькасць ападкаў можа ў два-тры разы перавышаць норму.

- У сярэднім у ліпені адзначаецца да васьмі дзён з маланкамі, але можа быць і 13 - 17. Град у гэтым месяцы не рэдкасць, - падкрэсліў Дзмітры Рабаў.

Паводле ягоных слоў, тэмпература вады ў рэках і азёрах у ліпені найбольш устойлівая і высокая - ад 24 градусаў са знакам плюс.

- Пакуль самым гарачым быў ліпень 2010 года, калі сярэдняя тэмпература паветра амаль на 5 градусаў перавысіла кліматычную норму. Абсалютны максімум +37,9 градусаў удалося зафіксаваць 29 ліпеня ў Лельчыцах, і на наступны дзень - у Гомелі, - сказаў Рабаў.

А вось у 1979 годзе ліпень быў найбольш халодным. Рабаў расказаў, што на дварэ было на 3,4 градуса ніжэй за шматгадовыя значэнні, а ў ноч на 18 ліпеня на метэастанцыі «Палеская» адзначаны мінімум +0,5 градусаў.