Беларусь уводзіць бязвізавы рэжым з Польшчай

Ці бяспечна палякам ехаць у Беларусь?

З 00 гадзін 1 ліпеня да 31 снежня ўключна грамадзяне Польшчы змогуць наведваць Беларусь без віз. Як паведамляе Дзяржаўны памежны камітэт, адпаведная пастанова прынятая "ў мэтах падтрымання добрасуседскіх стасункаў".

Памежнае ведамства паведамляе, што "ў мэтах падтрымання добрасуседскіх стасункаў" Лукашэнка прыняў пастанову аб увядзенні часовага бязвізавага парадку ўезду для грамадзян Польшчы. Яна пачне дзейнічаць з 00 гадзін 1 ліпеня да 31 снежня бягучага года ўключна.

- Для названай катэгорыі грамадзян перасякаць мяжу без візы будзе магчыма ў пунктах пропуску на беларуска-польскім адцінку мяжы. Таксама грамадзянам Польшчы будзе дазволена наведванне памежнай зоны без пропуску. Пры ўездзе ў Рэспубліку Беларусь у пункце пропуску дастаткова вусна паведаміць супрацоўніку органаў памежнай службы аб намеры наведаць памежную зону з указаннем населеных пунктаў і мэты іх наведвання, - растлумачылі ў Дзяржаўным памежным камітэце.

Для ўезду ў Беларусь грамадзянам Польшчы трэба будзе падаць сапраўдны дакумент для выезду за мяжу, зялёную карту (пры праездзе на аўтамабілі), а таксама мець пры сабе медыцынскую страхоўку.

ПЦР-тэст і сертыфікат аб вакцынацыі для перасячэння мяжы не патрабуецца.